collection of Ghazals (غزل)

[.]

Re: collection of Ghazals (غزل)

Apnaa Gham leke kahiiN aur na jaayaa jaaye
Ghar meN bikhri hui chiizoN ko sajaayaa jaaye

Jin chiraaGhoN ko havaaoN kaa koi Khauf nahiN
Un chiraaGhoN ko havaaoN se bachaayaa jaaye

Baagh meN jaane ke aadaab huaa karte haiN
Kisii titli ko na phuuloN se uDaayaa jaaye

Khudakushi karne ki himmat nahiN hotii sab meN
Aur kuchh din yuuNhi logoN ko sataayaa jaaye

Ghar se masjid hai bahut dur chalo yuN kar leN
Kisii rote hue bachche ko haNsaayaa jaaye

[.]

Re: collection of Ghazals (غزل)

Aankhain khuli rahain gi toh manzar bhi ayen gay

Zinda hai dil toh aur sitamgar bhi ayen gay



Pehchaan lo tamaam faqeeron kay khadd-o-khaal

Kuch log shab ko bhais badal kar bhi ayen gay



Gehri khamosh jheel kay paani ko yun na chaidh

Cheenthay uday toh teri qaba par bhi ayen gay



Khud ko chhupa na sheesha garon ki dukaan main

Sheeshay chamak rahey hain toh pathar bhi ayen gay

[.]

Re: collection of Ghazals (غزل)

To kya ye tay hai k ab umr bhar nahi milna..
To phir ye umar bhi kyon, tum se gar nahi milna..!
Chalo zamane ki khaatir ye jabr b seh len
K ab kabhi jo milay,toot kar nahi milna..
Ye kon chupke se tanhaiyon main kehta hai
mere baghair sakoon umr bhar nahi milna..
Rah-e-wafa k musafir ko kon samjhaaye
kay is safar mein koi humsafar nahi milna..
Juda to jab bhi hue dil ko yun laga jaise
k ab gaye to kabhi loat kar nahi milna..!!

[.]

Re: collection of Ghazals (غزل)

Ye mo’jezaa bhii muhabbat kabhii dikhaaye mujhe
K sang tujh pe gire aur zaKhm aaye mujhe

Vo meraa dost hai saare jahaaN ko hai maaluum
DaGhaa kare vo kisii se to sharm aaye mujhe

Vo meherbaaN hai to iqraar kyuuN nahiiN kartaa
Vo badgumaaN hai to sau baar aazmaaye mujhe

Vohii to sab se zyaada hai nukta-chiiN meraa
Jo muskuraa ke hamesha gale lagaaye mujhe

Barang-e-uud milegii use merii khushbuu
Vo jab bhii chaahe baRe shauq se jalaaye mujhe

MaiN apnii zaat meN niilaam ho rahaa huuN Qateel
Gham-e-hayaat se kah do khariid laaye mujhe

[.]

Re: collection of Ghazals (غزل)

Gulon Men Rang Bhare, Baad-E-Naubahaar Chale
Chale Bhii Aao K Gulshan Kaa Kaarobaar Chale



Qafas Udaas Hai Yaro, Sabaa Se Kuchh To Kaho
KahiN To Bahr-E-Khudaa Aaj Zikr-E-Yaar Chale



Kabhii To Subh Tere Kunj-E-Lab Se Ho Aagaaz
Kabhii To Shab Sar-E-Kaakul Se Mushkabaar Chale



BaRaa Hai Dard Kaa Rishtaa, Ye Dil Gharib Sahi
Tumhaare Naam Pe Aayenge Gham_Gusaar Chale



Jo Ham Pe Guzarii So Guzarii Magar Shab-E-HijraaN
Hamaare Ashk Terii Aaqebat SaNwaar Chale



Huzoor-E-Yaar Huii Daftar-E-Junuun Kii Talab
Girah Men Leke Garebaan Kaa Taar Taar Chale



Maqaam ‘Faiz’ Koii Raah Men Jachaa Hii NahiN
Jo Kuu-E-Yaar Se Nikle To Suu-E-Daar Chale

[.]

Re: collection of Ghazals (غزل)

Kya ishq tha jo baa’as e ruswaayi ban gaya
Yaaro tamaam shahr tamaashaayi ban gaya

Bin mange mil gaye meri aankhoN ko rat jaggay
MaiN jab say aik chand ka shaidaayi ban gaya

Dekha jo uska dast-e-hinaaee qareeb se
Ehsas goonjti hooyi shahnaayi ban gaya

Barham huaa tha meri kisi baat par koyi
Woh haadsa hi wajh-e-shanasayi ban gaya

Karta raha jo roz mujhay us say bad gumaan
Woh shakhs bhi ab usska tamannayi ban gaya

Woh teri bhi to pahli muhabbat na thi Qateel
Phir kya hoowa agar koyi harjaayi ban gaya

[.]

Re: collection of Ghazals (غزل)

Raz E ulfat chhupa ke dekh liya
Dil bahut kuchh jala ke dekh liya

Aur kya dekhne ko baaqi hai
Aap se dil lagaa ke dekh liya

Wo mere ho ke bhi mere na hue
Unko apnaa bana ke dekh liya

Aj unki nazar meN kuchh hamne
Sabki nazreN bachaa ke dekh liya

Aas us dar se TuTti hi nahiN
Ja k dekha, na ja ke dekh liya

‘Faiz’ takmil E Gham bhi ho na saki
Ishq ko aazmaa ke dekh liya

[.]

Re: collection of Ghazals (غزل)

Ye kyaa k sab se bayaaN dil kii haalateN karnee
‘Faraz’ tujh ko na aayiiN muhabbateN karnee

Ye qurb kyaa hai ke tuu saamane hai aur hameN
Shumaar abhii se judaayii kii sa’ateN karnee

koyi Khudaa ho k patThar jise bhii ham chaaheN
Tamaam umr usii kii ibaadateN karnee

Sab apane apane qariine se muntazir us ke
Kisii ko shukr kisii ko shikaayateN karnee

Ham apane dil se haiN majabuur aur logoN ko
Zaraa sii baat pe barpaa qayaamateN karnee

MileN jab un se to mubham sii guftaguu karanaa
Phir apane aap se sau-sau vazaahateN karnee

Ye log kaise magar dushmanii nibhaate haiN
HamiiN ko raas na aayiiN muhabbateN karnee

Kabhii ‘Faraz’ naye mausamoN meN ro denaa
Kabhii talaash puraanii raqaabateN karnee

[.]

Re: collection of Ghazals (غزل)

Dil meN ik lahr sii uThii hai abhii
koyii taazaa havaa chalii hai abhii

Shor barpaa hai Khaanaa-E-dil meN
Koyii diivaar sii girii hai abhii

Kuchh to naazuk mizaaj haiN ham bhi
Aur yeh choT bhii nayii hai abhii

Bharii duniyaa meN jii nahiiN lagtaa
Jaane kis chiiz kii kamii hai abhii

Tuu shariik-e-suKhan nahiiN hai to kyaa
Ham-suKhan terii Khaamushii hai abhii

Yaad ke be-nishaaN jaziiroN se
Terii aavaaz aa rahii hai abhii

Shahr ki be – charaaG galiyoN meN
Zindagii tujh ko DhuNDhtii hai abhii

So gaye log us havelii ke
Ek khiDakii magar khulii hai abhii

Tum to yaaro abhii se uTh baiThe
Shahr meN raat jaagatii hai abhii

Vaqt achchhaa bhii aayegaa ‘Nasir’
Gham na kar zindagii paDii hai abhii

[.]

Re: collection of Ghazals (غزل)

Wo sahiloN pe gaane waale kya hue
Wo kashtiyaN Chalane waale kya hue

wo dil meN khubne waali aankheN kya huiN
Wo hoNt muskuraane waale kya hue

Wo subh aate aate rah gayi kahaN
Jo qaafle the aane waale kya hue

MaiN jin ki raah dekhta hun rat bhar
Wo raushani dikhane waale kya hue

Ye kaun log haiN mere idhar udhar
Wo dosti nibhaane waale kya hue

ImaarateN to jal k rakh ho gayiN
ImaarateN banaane waale kya hue

Ye aap ham to bojh haiN zamin ka
ZamiN ka bojh uthaane waale kya hue

[.]

Re: collection of Ghazals (غزل)

Dil hi to hai na sang-o-khisht, dard se bhar na aaye kyuN
RoyeNge ham hazaar baar koi hameiN sataaye kyuN

Dair nahi, haram nahi, dar nahi, aastaN nahi
Baithe hain rahguzar pe ham, ghair hamein uthaaye kyuN

Jab wo jamal-e-dilfaroz, surat-e-mahr-e-nimaroz
Aap hi ho nazaarasoz, parde mein munh chupaaye kyuN

Dashna-e-gamza jansitaN, nawak-e-naz bepanaah
Tera hi aks-e-rukh sahi, samane tere aaye kyuN

Qaid-e-hayat-o-band-e-gham asl mein donoN ek haiN
Maut se pahle aadmi gham se najat paaye kyuN

Husn aur us pe husn-e-zan rah gayi bulahawas ki sharm
Apne pe etimaad hai ghair ko aazamaaye kyuN

WaN wo ghuroor-e-izz-o-naz, yaN ye hijab-e-pas waz’a
Raah mein ham milen kahaN, bazm mein wo bulaaye kyuN

HaaN wo nahi khudaparast, jaao wo bewafa sahi
Jisko ho din-o-dil aziz, us ki gali mein jaaye kyuN

“Ghalib”-e-khastaa k baghair kaun se kam band haiN
Roiye zar-zar kyaa, kijiye haaye-haaye kyuN

[.]

Re: collection of Ghazals (غزل)

Huii hai shaam to aankhoN mein bas gayaa phir tuu
Kahaan gayaa hai mere shahr ke musaafir tuu

Bahut udaas hai ik shakhs, tere jaane se
Jo ho sake to chalaa aa usii kii khaatir tuu

Merii misaal k ik nakhl-e-khushk-e-sahraa huuN
Teraa Khayaal k shaakh-e-chaman kaa taair tuu

Main jaantaa huun ke duniyaa tujhe badal degii
Main maantaa huuN ke aisaa nahiin bazaahir tuu

Hansii Khushii se bichhaR jaa agar bichaRnaa hai
Ye har maqaam pe kyaa sochataa hai aakhir tuu

‘Faraz’ tune use mushkiloN mein daal diyaa
Zamaanaa saahib-e-zar aur sirf shaayir tuu

[.]

Re: collection of Ghazals (غزل)

Na gaNvaao naavak-e-niim-kash, dil-e-reza reza gaNvaa diyaa
Jo bache haiN sang samet lo, tan-e-daagh daagh lutaa diyaa

Mere chaaraagar ko naved ho, saf-e-dushmanaaN ko Khabar karo
Wo jo qarz rakhate the jaan par, wo hisaab aaj chukaa diyaa

Karo kaj jabiiN pe sar-e-kafan, mere qaatiloN ko gumaaN na ho
K ghuruur-e-ishq kaa baaNkapan, pas-e-marg hamne bhulaa diyaa

Udhar ek harf k kushtanii, yahaaN laakh uzr thaa guftanii
Jo kahaa to sun ke uDaa diyaa, jo likhaa to padh ke mitaa diyaa

Jo ruke to koh-e-garaaN the ham, jo chale to jaaN se guzar gaye
Rah-e-yaar hamane qadam qadam, tujhe yaadagaar banaa diyaa

[.]

Re: collection of Ghazals (غزل)

Ye dil, ye paagal dil mera kyuN bujh gayaa? aavaargii
Is dasht meN ik shahar thaa wo kyaa huaa? aavaargii

Kal shab mujhe be-shakl sii aavaaz ne chauNkaa diyaa
MaiN ne kahaa tuu kaun hai? us ne kahaa aavaargii

Ik tuu k sadiyoN se mere ham_raah bhiii ham_raaz bhii
Ik maiN k tere naam se naa_aashnaa aavaargii

Ye dard kii tanhaa_iyaaN, ye dasht kaa viiraaN safar
Ham log to uktaa gaye apanii sunaa aavaargii

Ik ajnabii jhoNke ne jab, puchhaa mere gham ka sabab
Sahraa kii bhiiigii ret par maiN ne likhaa aavaargii

Le ab to dasht-e-shab kii saariii vus’ateN sone lagiiN
Ab jaaganaa hogaa hameN kab tak? bataa aavaargii

Kal raat tanhaa chaaNd ko dekha tha maiN ne Khaab meN
‘Mohsin’ mujhe raas aayegii, shaayad sadaa aavaargii

[.]

Re: collection of Ghazals (غزل)

Ishq mujhko nahin wahshat hi sahi
Meri wahshat teri shohrat hi sahi

Qat’aa kieje na taa’alluq hum se
Kuchh nahin hai to adaawat hi sahi

Mere hone main hai kya ruswaai
Ye woh majlis nahin khalwat hi sahi

Hum bhi dushman to nahin hain apne
Ghair ko tujh se mohabbat hi sahi

Apni hasti hi se ho jo kuchh ho
Aagahi gar nahin ghaflat hi sahi

Umr harchand k hai barq-E-kharaam
Dil ko khuN karne ki fursat hi sahi

Hum koi tark-e-wafaa karte hain
Naa sahi ishq, museebat hi sahi

Kuchh to de Ae falak-e-na-insaaf
Aah-o-fariyaad ki rukhsat hi sahi

Hum bhi tasleem ki khuu dalenge
Be – neyaazi teri aadat hi sahi!!!

Yaar se chheR chali jaaye “Asad”
Gar nahin wasl to hasrat hi sahi