collection of Ghazals (غزل)

[.]

Re: collection of Ghazals (غزل)

Jaane vaaloN se raabetaa rakhnaa
Dosto rasm-e-faatihaa rakhnaa



Ghar kii ta’amiir chaahe jaisii ho
Us meN rone kii kuch jagah rakhnaa



MasjideN haiN namaaziyoN ke liye
Apne ghar meN kahiiN Khudaa rakhnaa



Jism meN phailne lagaa hai shahr
Apnii tanhaaiyaaN bachaa rakhnaa



Umr karne ko hai pachaas ke paar
Kaun hai kis jagah, pataa rakhnaa

[.]

Re: collection of Ghazals (غزل)

Sab log liye sang-E-malaamat nikal aaye


Kis shahr meN ham ahal-E-muhabbat nikal aaye


Ab dil kii tamannaa hai to ai kaash yahii ho


AaNsuu kii jagah aaNkh se hasarat nikal aaye


Har ghar kaa diyaa gul na karo tum K na jaane


Kis baam se Khurashiid-E-Qayaamat nikal aaye


Jo dar_paa-E-pindaar haiN un qatl_gahoN se


JaaN deke bhii samajho K salaamat nikal aaye


Ae ham_nafaso kuchh to kaho ahad-E-sitam kii


Ek harf se mumkin hai hikaayat nikal aaye


Yaaro mujhe masaluub karo tum K mere baad


Shaayad K tumhaaraa qad-O-qaamat nikal aaye

[.]

Re: collection of Ghazals (غزل)

Ta’zeer-E-ehtimaam-E-chaman kaun day gaya
Mujh ko gulaab jaisa kafan kaun day gaya


Daikhay jo khadd-O-khaal to socha hai baarhaa
Sehra ki chaaNdni ko badan kaun day gaya




Meri jabeeN ki saari lakeeraiN teri ataa
Lekin teri qaba ko shikan kaun day gaya




Teray hunar mai khilwat-E-khushboo sahi magar
KaantoN ko umr bhar ki chubhan kaun day gaya




Jungal say poochti haiN hawaaoN ki barhami
Jugnoo ko tairgi mai kiran kaun day gaya




Kis ne basaaye aaNkh mai ashkoN kay qaaflay
Be-ghar musaafiroN ko watan kaun day gaya




Tujh say to khair pal ki musaafat ka saath tha
Meray badan ko itni thakan kaun day gaya




ToRa hai kis nay nok-E-sinaaN par sakoot-E-sabr
Lab bastagi ko taab-E-sukhan kaun day gaya




‘Mohsin’ wo kaayinaat-e-ghazal hai ussay bhi daikh
Mujh say na pooch mujh ko yeh fun kaun day gaya

[.]

Re: collection of Ghazals (غزل)

Safeenay hi ko tere wastay toofaan kar dega
Samundar ek din mushkil teri aasaan kar dega

Agar muNh zor maujoN ko lagaamaiN de nahiN saktay
To yeh dariya tumharay khait raigistaan kar dega

Muhabbat aarzo_oN ki nayi basti basaaye gee
JunuuN baRh kar dar-O-diwar ko maidaan kar dega

Samajhta hai mere ash’aar par tanqeed likhnay say
Wo meri saat pushtoN par baRa ehsaan kar dega

Abhi ummeed baqi hai ke wo bichRa huaa saathi
Kisi bhi moR par mill kar hamaiN hairaan kar dega

Teri qurbat meN rah kar mujh ko bhi izaat mili lekin
Yahi saamaan aapas meN hamaiN anjaan kar dega

Usay nazdeek aa kar door rahna khooob aata hai
Wo zalim muskura kar bhi tera apmaan kar dega

Baher surat basher hai dost, paiGhamber nahiN koi
Wo apnay naf’a par beshak tujhay qurbaan kar dega

Ajab kamzor lamhay meN sada di hai sadaqat ne
‘Muzaffar’ aaj har qatra lahoo ka daan kar dega

[.]

Re: collection of Ghazals (غزل)

Kitnaa kaam kareNge


Ab aaraam kareNge


Tere diye hue dukh


Tere naam kareNge




Ahal-E-dard hi aakhir


KhushiyaaN aam kareNge




Kaun bacha hai jise voh


Zer-E-daam kareNge




Naukri chhoR k ‘Nasir’


Apnaa kaam kareNge

[.]

Re: collection of Ghazals (غزل)

Safar meN dhoop to hogi jo chal sako to chalo
Sabhi haiN bheeR meN tum bhi nikal sako to chalo


Idhar udhar kayi manzil haiN chal sako to chalo
Bane banaaye haiN saaNche jo Dhal sako to chalo


Kisi ke waaste raaheN kahaaN badalati haiN
Tum apane aap ko Khud hi badal sako to chalo


YahaaN kisi ko koyii raastaa nahi detaa
Mujhe giraake agar tum sambhal sako to chalo


Yahi hai zindagi, kuchh Khaak, chand ummeedeN
Inhi khilonoN se tum bhi bahal sako to chalo


Har ik safar ko hai mahafooz raastoN ki talaash
HifaazatoN ki rivaayat badal sako to chalo


KahiN nahi koi sooraj dhuaaN dhuaaN hai fizaa
Khud apane aap se baahar nikal sako to chalo

[.]

Re: collection of Ghazals (غزل)

Gaisu-E-shaam meN aik sitaaraa aik khyaal
Dil meN liye phirte haiN tumharaa aik khyaal


Baam-E-falak par sooraj,chaaNd, sitaara tha
Ham ne beyaaz-E-dil pe utaaraa aik khyaal


Kabhi to un ko bhi dekho, jin logoN ne
Umr gaNwaai aur saNwaaraa aik khyaal


Yaad k shahr k shor se kaale kosoN door
Dasht-E-faraamoshi se pukaaraa aik khyaal


YuN bhi hua hai dil k muqaabil duniya thi
Phir bhi na haaraa phir bhi na haaraa aik khyaal


Mujh par zarb paRi to khalqat ne dekha
Meri bajaaye paaraa paaraa aik khyaal


Aik musaafat, aik udaasii, aik ‘Faraz’
Aik tamannaa, aik sharaaraa, aik khyaal

[.]

Re: collection of Ghazals (غزل)

Kabhi jo cheR gayee yaad-E-raftagaaN Mohsin
Bikhar gayee haiN nigaaheN kahaaN kahaaN Mohsin



Hawa ne raakh urraaii to dil ko yaad aayaa
K jal bujheeN mere khaabon ki bastiyaaN Mohsin



Kuch aaise ghar bhi miley jin meN ghooNgatoN k iwaz
Hui haiN dafn dopattoN meN larrkiyaaN Mohsin



KhaNdar hai ahd-E-guzishta na chhu na chheR isay
KhuleN to band na hoN is ki khirrkiyaaN Mohsin



Bujha hai kaun sitaaraa k apni aankh k saath
Huey haiN saare manaazir dhuaaN dhuaaN Mohsin



Nahi k us ne ganwaaye haiN maah O saal apne
Tamaam umr kaTi yuun bhi raaegaaN Mohsin



Mila to aur bhi taqseem kar gaya mujh ko
SameiTna theeN jisay meri kirchiyaaN Mohsin



KahiN se us ne bhi toRa hai khud se rabt-E-wafa
Kahin se bhool gaya maiN bhi daastaaN Mohsin

[.]

Re: collection of Ghazals (غزل)

Woh firaaq aur woh vissal kahaN
Woh shab-O-roz-O-maah-O-saal kahaaN


Fursat-E-karobaar-E-shauq kise
Zauq-E nazzaara-E jamaal KahaaN


Dil to dil vo dimagh bhi na raha
Shor-E-sauda E khatt-O-Khal KahaaN


Thi wo ik shakhs ke tasawwur se
Ab wo raanaayi-E-khayal kahaaN


Aisaa aasaaN nahiN lahoo ronaa
Dil meN taaqat jigar meN haal kahaaN


Humse chhuta Qumaar-khana E-ishq
WaaN Jo JayeN girah meN maal kahaaN


Fikr-E-duniya meN sar khapata HuN
MaiN kahaaN aur yeh vabaal kahaaN


Muzmahil ho gaye Quwaa ‘Ghalib’
Woh anaasir meN aitedaal kahaaN

[.]

Re: collection of Ghazals (غزل)

Yaas meN jab kabhi aaNsuu niklaa
Ek nayii aas kaa pahluu niklaa

Le uRii sabza-e-Khudrau ki mahak
Phir terii yaad kaa pahluu niklaa

MiiThii bolii meN papiihe bole
Gungunaataa huaa jab tuu niklaa

AayiiN saavan kii andherii raateN
KahiiN taaraa, kahiiN jugnuu niklaa

Naye mazmuun sujhaatii hai sabaa
Kyaa idhar se vo suman-buu niklaa

PaaNv chhilne lagii jaltii huii ret
Dasht se jab koii aahuu niklaa

Kayii din raat safar meN guzre
Aaj to chaaNd lab-e-juu niklaa

Taaq-e-maiKhaanaa meN chaahii thii amaaN
Vo bhii teraa Kham-e-abruu niklaa

Ahl-e-dil sair-e-chaman se bhii gaye
Aks-e-gul saayaa-e-gesuu niklaa

Vaaqe’aa ye hai ke badnaam hue
Baat itnii thii ke aaNsuu niklaa

[.]

Re: collection of Ghazals (غزل)

Kab hawaa E sitam se darte the
Khaahish E rang O boo jo karte the


Us gali meN kabhi na khaak uRe
Be sabab jis se hum guzarte the


Uski yaadeN udaas karti thiN
Uski yaadoN se hi saNwarte the


Ek aisa bhi daur guzraa hai
Log aapas meN pyaar karte the


Jaane kya mashGhalaa hai ab unka
Zindagi meN jo rang bharte the

[.]

Re: collection of Ghazals (غزل)

Gham-e-Hijar Se Na Dil Ko Kabhi Humkinaar Karna
MaiN Phir AauuNga Palat Kar Mera Intezaar Karna


Mujhe Darr Hai, Mere Aansoo Teri Aankh Se Na JhalkeN
Zara Sooch Kar Samajh Kar Mujhe Sogawaar Karna


Usay Dhoond Sab Se Pehlay Jo Mila NahiN Hai Tujh Ko
Yeh Sitaaray AasmaaN Kay Kabhi Phir Shumaar Karna


Mere Shahr Ki Fiza MeN Koi Zahr Bhar Gaya Hai
Tere Husn Par Hai Laazim Ussay Khushgawaar Karna


MaiN UthauuNgaa Na EhsaaN Tere Baad Na-Khuda Ka
Mujhe Tu Ne Hi Duboya, Mujhe Tu Hi Paar Karna


Mere Bad-Naseeb sathi, Teri Zindagi Hi Kya Hai
Na Kisi Sey Dil Lagaanaa, Na Kisi Sey Pyaar Karna


Kabhi Iqtidaar BaKhshay Jo Khuda ‘Qateel’ Tujh Ko
Jo Rawish Hai QatiloN Ki, Woh Na Ikhtiyaar Karna

[.]

Re: collection of Ghazals (غزل)

Main mar mita to wo samjha ye inteha thi meri
Usay khabar hi na thii, khaak kimiya thi meri

MaiN chup hua to wo samjha k baat khatam hui
Phir us k baad to aawaaz ja ba ja thi meri

Jo taa’na zan tha meri poshish E dardidaa par
Usi ke dosh pay rak_khi houi qaba thi meri

MaiN us ko yaad karuN bhi to yaad ata nahiN
MaiN us ko bhool gaya huN, yahi saza thi meri

Shikast de gaya apna Ghoroor hi us ko
Wagarna us k muqabil basaat kya thi meri

KahiN dimaGh kahiN dil kahiN badan hi badan
Har ek se dosti yaari juda juda thi meri

Koi bhi koo E muhabbat say phir nahin guzra
To shahr E ishq maiN kya akhri sada thi meri

Jo ab ghamand say Sar ko uThaaye phirti hai
Isi tarah ki to makhlooq khaak E pa thi meri

Har aik shair na tha dar khor E qaseeda dost
Aur us say tab’ae E rawaaN khub aashna thi meri

MaiN usko dekhta rahta tha hairatoN se ‘Faraz’
Ye zindagi se ta’aaruf ki ibtedaa thi meri

[.]

Re: collection of Ghazals (غزل)

Abke ye ehteyaat bhi kar jaanaa chaahiye !!!
Andhi se qabl khud hi bikhar jaanaa chaahiye


Haan jab mujhe jamood ki tohmat hi mil gayi
To dil se bhi khayaal E safar jaanaa chaahiye


Sab raaste hisaar ke jangal meN qaid haiN
Kya faisla kareN K kidhar jaanaa chaahiiye


Rahzan to sab kamaayaa jua maal le gaye
Ab sirf jaan leke na ghar jaanaa chaahiye


Karte haiN be sabab hi khataayeN ma’aaf jo
Aise “khataa ma’aaf” se dar jaanaa chaahiye


Kuchh faisle to hoNge mere ikhtiyaar ke
Aankhon se ye Ghilaaf utar jaanaa chahiye


Jab mere paas us ke liye chhat talak nahi
Ae uski aarzoo, tujhe mar jaanaa chaahiye

[.]

Re: collection of Ghazals (غزل)

NahiN nigaah meN manzil to justajuu hii sahii


NahiN visaal muyassar to aarazuu hii sahii


Na tan meN Khuun faraaham na ashk aankhon meN


Namaaz-e-shauq to vaajib hai be-vazuu hii sahii


Kisii tarah to jame bazm!! maikade vaalo


NahiN jo baadaa-O-saaGhar to haa-O-hu hii sahii


Gar intezaar kathin hai to jab talak ai dil


Kisi ke vaada-E-fardaa ki guftaguu hii sahii


Dayaar-E-Ghair meN maharam agar nahiN koii


To ‘Faiz’ zikr-E-vatan apne ruubaruu hii sahii