collection of Ghazals (غزل)

[.]

Re: collection of Ghazals (غزل)

Tooti hai meri neeNd magar tumko is se kya?
Bajte raheN hawaaoN se dar, tumko is se kya?


Tum mauj mauj misl E sabaa ghoomte raho
Kat jayeN meri soch ke par, tumko is se kya?


AuroN ka haath thaamo, unheN raasta dikhaao
Main bhool jaooN apna hi ghar, tumko is se kya?


Abr E gurez paa ko barasne se kya gharaz
Seepi meN ban na payeN gohar tumko is se kya?


Le jayeN mujhko maal E Ghanimat ke saath udu
Tum ne to daal di hai sipar, tumko is se kya?


Tumne to thak ke dasht meN khiime laga liye
Tanha kaTe kisi ka safar, tumko is se kya?


........


Hum parvarish E lauh O Qalam karte raheNge
Jo dil pe guzarti hai raQam karte raheNge


Asbaab E Gham E ishq baaham karte raheNge
Veerani E dauraaN pe karam karte raheNge


HaaN talkhi E aiyyaam abhi aur baRhegi
HaaN ahl E sitam mashq E sitam karte raheNge


Manzoor ye talkhi ye sitam hum ko gavaara
Dam hai to madaava E alam karte raheNge


Maikhaana salaamat hai to hum surkhi E mai se
Taz’een E dar O baam E haram karte raheNge


Baaqi hai lahu dil meN to har ashk se paidaa
Rang E lab O rukhsaar E sanam karte raheNge


Ek tarz E taGhaaful hai so wo un ko mubaarak
Ek arz E tamanna hai so hum karte raheNge

[.]

Re: collection of Ghazals (غزل)

Hum sunayaiN to kahaani aur hai
Yaar logoN ki zabaani Aur hai

Chaaragar rote haiN taza zakhm ko
Dil ki beemari puraani aur hai

Jo kaha humne wo mazmuN aur tha
TarjumaaN ki tarjumaani aur hai

Hai bisaat E dil laho ki aik booNd
Chasham E purkhuN ki ravaani aur hai

Namabar ko kuch bhi hum paiGhaam daiN
DastaaN us ne sunaani aur hai

Aab E zamzam dost laaye haiN abas
Hum jo peetay haiN wo paani aur hai

Sab Qayamat QamatoN ko dehkh lo
Kya mere janaaN ka saani aur hai?

Ahl E dil ki anjuman meN aa kabhi
In ki duniya yaar jaani aur hai

Shairy karti hai ik duniya ‘Faraz’
Par teri saadaa bayaani aur hai

[.]

Re: collection of Ghazals (غزل)

Safar E manzil E shab yaad nahiN
Log rukhsat hue kab yaad nahiN


Dil meN har waqt chubhan rahti thi
Thi mujhe kis ki talab yaad nahiN


Wo sitaara thi K shabnam thi K phul
Ek soorat thi ajab yaad nahiN


Aisa uljha huN gam E duniya meN
Ek bhi khaab E tarab yaad nahiN


Bhoolte jaate haiN maazi ke dayaar
Yaad aayeN bhi to sab yaad nahiN


Ye haqeeqat hai K ahbaab ko hum
Yaad hi kab thhay jo ab yaad nahiN


Yaad hai sair E charaaGhaaN ‘Nasir’
Dil ke bujhne ka sabab yaad nahiN

[.]

Re: collection of Ghazals (غزل)

Tujhe hai Mashq E Sitam ka Malaal waise hi
Humaari Jaan hai, JaaN par wabaal waise hi


Chala Tha Zikr Zmaane ki Bewafaayi ka
So aa gaya hai tumhara Khayal waise hi


Hum aa gaye haiN Tah E Daam to Nasib apna
Wagarna usne to phenka tha Jaal waise hi


MaiN rokna hi nahin chahta tha Waar uska
Giri nahin Mere Haathon se Dhaal waise hi


Zamaana humse bhala Dushmani to kya rakhta
So kar gaya hai humaiN Paayemaal waise hi


Mujhe bhi ShouQ na tha DaastaaN sunane ka
‘Faraz’ usne bhi poocha tha Haal waise hi

[.]

Re: collection of Ghazals (غزل)

Apni dhun meN rahtaa huN
MaiN bhii tere jaisaa huN

O pichhlii rut ke saathii
Abke baras maiN tanhaa huN

Terii galii meN saaraa din
Dukh ke kankar chuntaa huN

Mujh se aaNkh milaaye kaun
MaiN teraa aaeenaa huN

Meraa diyaa jalaaye kaun
MaiN tera Khaalii kamraa huN

Tuu jiivan kii bharii galii
MaiN jangal ka rastaa huN

Apni lahr hai, apnaa rog
Dariyaa huN aur pyaasaa huN

Aatii rut mujhe royegii
Jaati rut ka jhoNkaa huN

[.]

Re: collection of Ghazals (غزل)

Jala diyaa shajar E jaaN, K sabz bakht na tha
Kisi bhi rut me haraa ho ye wo darakht na tha


Jo khaab dekha tha shahzaadiyoN ne pichhle pahar
Phir us ke baad muqaddar me taaj O takht na tha


Zara se jabr se maiN bhi to toot sakti thi
Meri tarah se tabi’at ka woh bhi sakhta na tha


Andheri raatoN ke tanhaa musaafiroN k liye
Diyaa jalata hua koi saaz O rakht na tha


Mere liye to wo khanjar bhi phool ban ke uThaa
Zabaan sakht thi, lehjaa magar karakht na tha




Gaye wo din k mujhi tak tha mera dukh mahdood
Khabar ke jaisaa ye afasaana lakht lakht na tha

[.]

Re: collection of Ghazals (غزل)

Gira aaNkhoN se chaknAa choor hokar
Teraa saayaa, mujassam noor hokar



Agar socho to wazni ho gayee hai
Hamari baat naa manzoor hokar



Kisi ka paas aa kar door honaa
kahiN andar mahakna door hokar



Nazar Qaus E Qazah si tan rahi hai
Kisi ke jism se bhar poor hokar



‘Muzaffar’ dekhna kya ban gayi hai
Ghazal jazbaat se ma’moor hokar

[.]

Re: collection of Ghazals (غزل)

Yeh to uska hi karishma hai fusuN hai, yuuN hai
YuN to kahne ko sabhi kahte haiN yuN hai yuuN hai


Tum muhabbat meN kahaN sood O zyaaN le aaye
Ishq ka naam khirad hai na junuN hai, yuuN hai


Jaise koi ho dar E dil pe sitaadaa kab se
Aik saayaa na daruN hai na baruN hai, yuuN hai


Ab tum aaye ho meri jaan!! tamaashaa karne
Ab to darya meN talatum na sukuN hai, yuuN hai


Tu ne dekhi hi nahiN dasht E wafaa ki tasveer
Nok E har khaar pe ek qatra E khuN hai, yuuN hai


Naaseha! tujh ko khabar kya ke muhabbat kya hai
Roz aa jaata hai samjhaataa hai, yuN hai, yuuN hai


Shaairi taza zamaanoN ki hai me’maar “Faraz”
Yeh bhi ik silisila E “Kun Fa YakuN” hai, yuuN hai

[.]

Re: collection of Ghazals (غزل)

Giraftaa dil haiN bahut aaj tere deewane
Khuda kare koi tere siva na pahchaane

Miti miti si umeedaiN thake thake se khayaal
Bujhe bujhe se nigaahoN meN Gham ke afsaane

Hazaar shukr K hum ne zubaaN se kuch na kaha
Yeh aur baat K poochhaa na ahl E duniya ne

Ba-qadr-e-tashna-labi pursish-e-wafa na huee
Chhalak ke rah gaye teri nazar ke paimaane

Khayaal aa gaya maayuus rahguzaaroN ka
Palat ke aa gaye manzil se tere deewane

KahaaN hai tu K tere intezaar meN ae dost
Tamaam raat sulagte haiN dil ke veeraane

Ummeed E pursish E Gham kis se keejiye ‘Nasir’
Jo mere dil pe guzarti hai koi kya jaane

[.]

Re: collection of Ghazals (غزل)

Tum aaye ho na shab-E-intezaar guzrii hai
Talaash meN hai sehar baar baar guzrii hai

JunuuN meN jitni bhi guzri bakaar guzarii hai
Agar che dil pe kharaabii hazaar guzrii hai

Huii hai hazrat-E-naaseh se guftaguu jis shab
Wo shab zaruur sar-E-kuu-E-yaar guzrii hai

Woh baat saare fasaane meN jiskaa zikr na thaa
Woh baat unko bahut naa-gavaar guzrii hai

Na gul khile haiN, na un se mile, na mai pi hai
Ajeeb rang meN ab ke bahaar guzrii hai

Chaman meN Ghairat-E-gulchiN pe jane kya guzri
Qafas se aaj sabaa be – Qaraar guzrii hai

[.]

Re: collection of Ghazals (غزل)

Jaur se baaz aaye par baaz aayaiN kya ?
Kehte haiN, ham tumko muNh dikhlayaiN kya ?

Raat din gardish meiN haiN saat aasmaaN
Ho rahega kuchch-na-kuchch ghabraayaiN kya ?

Laag ho to usko ham samjhaiN lagaav
Jab na ho kuchch bhee, to dhoka khayaiN kya ?

Ho liye kyuN naamaabar ke saath-saath ?
Yaar! apne KHat ko ham pahuNchaayaiN kya ?

Mauj-E-KHooN sar se guzar hee kyuN na jaaye
Aastaan-E-yaar se uTh jaayaiN kya ?

Umr bhar dekhaa kiye marne kee raah
Mar gaye par dekhiye dikhlaayaiN kya ?

Poochchte haiN woh K ‘GHalib’ kaun hai ?
Koee batlaao K ham batlaayaiN kya ?

[.]

Re: collection of Ghazals (غزل)

Marne se bhi pahle mar gaye the
Jeene se kuchh aise dar gaye the



Raste me jahaaN talak diyay the
Saare mere hum-safar gaye the



AaNkheN abhi khul nahi saki thiN
Aur khaab mere bikhar gaye the



Jab tak na khila tha Us ka waada
Mausam mere be samar gaye the



Gardaab se bachne waaloN ki samt
Saahil se kayi bhaNvar gaye the

[.]

Re: collection of Ghazals (غزل)

Jis ki jhankaar meN dil ka aaraam tha, woh teraa naam tha
Mere hoNtoN pe raqsaaN jo ek naam tha, woh teraa naam tha

Mujh se mansoob thiN daastaanaiN kayi, Ek se ek nayee
Khubsurat magar jo ek ilzaam tha, woh teraa naam tha

Kaise karta kisi aur ki guftaguu, yaad tha sirf tu
Mujh ko mere junuN ka jo in’aam tha, woh teraa naam tha

Subh se shaam tak jo mere paas thi, woh teri aas thi
Shaam tak jo kuchh lab E baam, woh teraa naam tha

Dost jitne the naa aashnaa ban gaye, paarsaa ban gaye
Jo mere saath ruswa sar E aam tha, woh teraa naam tha

Gham ne taarikiyoN me uchhaalaa mujhe, maar daalaa mujhe
Ek nayi chaaNdni ka jo paigham tha, woh teraa naam tha

Tere hi dam se hai yeh ‘Qateel’ aaj bhi, shairy ka wali
Us ki GhazloN meN kal bhi jo ilhaam tha, woh teraa naam tha

[.]

Re: collection of Ghazals (غزل)

Chaaraa – gar haar gaya ho jaise
Ab to marnaa hi dawaa ho jaise


Mujhse bichhRa tha vo pahle bhi magar
Ab ke yeh dard naya ho jaise


Mere maathe pe tere pyar kaa haath
Rooh par dast E sabaa ho jaise


YuN bahut haNs k mila tha lekin
Dil hi dil me woh khafaa ho jaise


Sar chhupaayeN to badan khulta hai
Zeest muflis ki ridaa ho jaise

[.]

Re: collection of Ghazals (غزل)

Gulaab haath meN ho, aaNkh mein sitaaraa ho
Koi wujood mohabbat ka iste’aaraa ho

MaiN gahray paani ki is ro ke saath bahti rahuN
Jazeeraa ho ke muqaabil koi kinaaraa ho !

Kabhi kabhaar usay dekh leN, kahiN mil leN
Yeh kab kaha tha ke woh khushbadan hamaaraa ho

Qusoor ho to hamaare hisaab meN likh jaaye
MohabbatoN meN jo ehsaan ho, tumhaaraa ho

Yeh itni raat gaye kaun dastakaiN degaa
KahiN hawa ka hi uss ne na roop dhaaraa ho

Ufaq to kya hai dar-E-kehkashaaN bhi chhu aayeN
MusafiroN ko agar chaaNd ka ishaaraa ho

MaiN apne hissay ke sukh jiske naam kardaaluN
Koi to ho jo mujhe iss tarah ka pyaaraa ho

Agar wujood meN aahang hai to wasl bhi hai
MaiN chaahe nazm ka tukRa, woh nasr paaraa ho