Eshaa Ka Intikhaab

[Eshaa Chaudhry]

Re: Eshaa Ka Intikhaab

Na Chero Khilti kalyoo'n, Hanstay Phooloo'n Ko
In Urti Titliyoo'n, Aawara Bhanwroo'n Ko,
Tassalsul Toot Jaye Ga!

Fiza Mehw E Samma'at Hai,
Haseen Hoontoo'n Ko Naghma-Rez Rehne Do,
Nigahai'n Neechi Rakho Aur Mujassam Gosh Ban Jao
Agar Junbish Laboo'n Ko Di,
Tassalsul Toot Jaye Ga!

Hawa Say Patiyaa'n Sargoshiyoo'n Main Mehav Hain
Aur Jhoomti Shakhoo'n Ke Jhooloo'n Mein
Parindoo'n Ki Chahek Se Sara Sahil
Sarmadi Ehsas Main Dooba Huwa
Sarshar-O-Shadaa'n Hai
Agar Kankar Bhi Satah-E-Aab Pe Marra
Tassalsul Toot Jaye Ga!

Ufuq Main Doobtay Sooraj Ka Manzar
Iss Bulandi Se Zara Daikho
Issi Rangee'n Kinaaray Par,
Shafaq Sona Lutaey Gi
Yoon'hi Tum Beyhiss-O-Saakit Raho
Aise Main Palkain Bhi Zara Jhapkain
Tassalsul Toot Jaye Ga!

Wo Khuwabeeda Hai, Khuwabeeda Hi Rehne Do
Na Jaane Khuwaab Main Kin Waadiyoo'n Ki Sair Karti Ho
Bulandi Se Phisalte Aabsharoo'n Main Kahi'n Gum Ho
Falak Aasaar Chotti Par Kahi'n Mehway Tarranum Ho
Agar Awaaz Di Tum Ne
Tassalsul Toot Jaye Ga!

Main Shayar Hoo'n,
Mairi Fikr-E-Rassa, Ehsass Ki Uss Satah Par Hai
Jiss Main Khushboo Rang Banti Hai
Sadda Ko Shakal Milti Hai
Tassavvur Bol Uthta Hai
Khamoshi Gungunaati Hai
Yeh wo waqfa hai _ Aise Main,
Agar Daad-E-Sukhan Bhi Di
Tassalsul Toot Jaye Ga!