sun ! musaafir tujh ko kuchh apnee Khabar hai keh naheeN

[Ismail Ajaz]

Khayaal kaa peGham aur uske tamaam chaahne waaloN ko aur urdu se muHabbat rakhne waaloN ko salaam

arz e Khidmat hai


sun ! musaafir tujh ko kuchh apnee Khabar hai keh naheeN
Zaad e raah tere safar kee muKhtaSar hai keh naheeN

tuu baGhaawat kar rahaa hai apne maalik se magar
dekh le arZ o samaa se bhee mafar hai keh naheeN

hai Zarooree jaannaa manzil ko paane ke liye
meree manzil ke liye yeh raihguzar hai keh naheeN

apne apne waqt par lowg aa'eN ge aur jaa'eN ge
saath unke chalne kaa tujh meN hunar hai keh naheeN

sun rahaa hai har ko'ee Allaah akbar kee Sadaa
dekhnaa yeh hai gayaa sajde meN sar hai keh naheeN

hai naheeN furSat tujhe labbayek kaihne ke liye
tuu huwaa maSroof dunyaa meN idhar hai keh naheeN ?

so rahaa hai kis liye Ghaflat kee chaadar auRh kar
apne rab se hee huwaa tuu beKhabar hai keh naheeN

kaamyaabee ke liye jo dekhtaa tuu Khwaab hai
unkee ta'AbeeroN peh bhee rakhtaa nazar hai keh naheeN

ko'ee teraa saath dene ke liye raaZee tow ho
jaan e mann dildaar yaa laKht e jigar , hai keh naheeN ?

tuu akelaa jaa'ey gaa teree laHd meN bhee "Khayaal"
chhoR deN ge sab tujhe tanhaa udhar hai keh naheeN


Ismail Ajaz Khayaal

[thefire1]

Re: sun ! musaafir tujh ko kuchh apnee Khabar hai keh naheeN

Assalaam-O-alaikum

aik aur bohat hi khoobsurat pegham laiti hoyee tehreer..... bohat hi khoobsurat andaaz say humaray soyay huway zameer ko jagaanay ki KAMYAAB koshish ki hay aap nay, JAZAK ALLAH KHAIR


yeh shairr bohat hi khoobsurat laga ...

apne apne waqt par lowg aa'eN ge aur jaa'eN ge
saath unke chalne kaa tujh meN hunar hai keh naheeN


Khush rahyeh aur issi tarah zour-e-qalam say diloon per raaj kartay rahyeh

FI amaan ALLAH

[Ismail Ajaz]

Re: sun ! musaafir tujh ko kuchh apnee Khabar hai keh naheeN

Assalaam-O-alaikum

aik aur bohat hi khoobsurat pegham laiti hoyee tehreer..... bohat hi khoobsurat andaaz say humaray soyay huway zameer ko jagaanay ki KAMYAAB koshish ki hay aap nay, JAZAK ALLAH KHAIR


yeh shairr bohat hi khoobsurat laga ...

apne apne waqt par lowg aa'eN ge aur jaa'eN ge
saath unke chalne kaa tujh meN hunar hai keh naheeN


Khush rahyeh aur issi tarah zour-e-qalam say diloon per raaj kartay rahyeh

FI amaan ALLAH

salaam aap kee Khidmat meN ,aur aap kee iss muHabbat o inaayat o pazeeraa'ee ke liye saraapaa e sipaas guzaar hooN ,Allah aapko duniyaa o aaKhirat meN Khushiyaan o izzateN marHamat farmaa'ey
aap kaa beHad shukriyah
wassalaam