Tweet
دلکش پرندہ
ہمارا ذہن اِک آذاد پنچھی کی طرح سے ہے
جو ہر اِک پل
کسی پرواز کو تیار رہتا ہے
مگر کچھ لوگ اِس کو ایک پنجرے میں
مقیّد کر کے رکھتے ہیں
اِسے سونے کا دانہ تو کھِلاتے ہیں
مگر
آزاد ہی ہونے نہیں دیتے
اِسے اپنی خوشی اور اپنی خواہش سے
کبھی جگنے نہیں دیتے
کبھی سونے نہین دیتے
یہ ہنسنا چاہتا ہے تو
اِسے ہنسنے نہیں دیتے
یہ رونا چاہتا ہے تو
اِسے رونے نہیں دیتے
بہت سی خوبصورت منزِلوں کو
کبھی پانے نہیں دیتے
کبھی بدبو ذدہ بیرنگ بیوقعت
رویّوں کو
کہیں کھونے نہیں دیتے
مگر
میرے ذہن میں جو پرندہ ہے
بڑا سرکش بڑا باغی ہے یہ
یہ میرے دل کی ٹہنی پر
ٹہرتا ہی نہیں آکر
ہمیشہ کھول کے پر
سوچ کی پرواز کو تیّار رہتا ہے
یہ ہر اِک شخص کا ڈالا ہوا
دانہ نہیں چُگتا
کسی بھی دوغلے چہرے کو گر دیکھے
شور کرنے سے نہیں رُکتا
اِسےجب چوٹ لگتی ہے
تڑپتا ہے
پھڑکتا ہے
جھٹکتا ہے
جھگڑتا ہے
کبھی آنسو گراتا ہے
کبھی فریاد کرتا ہے
مجھے یہ تنگ کرتا ہے
یہ مجھ سے جنگ کرتا ہے
مگر پھر بھی
بڑانایاب پنچھی ہے
بڑا دِلکش پرندہ ہے
مجھے اِس سے محبّت ہے
خوشی ہے کہ
یہ زندہ ہے
کبھی یہ روٹھ جاتا ہے
کبھی یہ مان لیتا ہے
مگر مجھ سے مخاطِب ہو
تو میری جان لیتا ہے
میرے سارے اِرادوں کو
کسوٹی پر پرکھتا ہے
نہ جب تک فیصلہ دیدے
ہمارادل دھڑکتا ہے
ہمیشہ دن نکلتا ہے
ہمیشہ رات ہوتی ہے
مگر اِس کے لۓ اندر کوئ
بے موسمی بیوقت کی
برسات ہوتی ہے
یہ بارش اِس کے دلکش پر کے اوپر
آگ کی طرح برستی ہے
جھلستی اِس میں اِس کی ساری کی ساری
ہی ہستی ہے
پروں کو کھول کر
آنکھوں کو اپنی بند کر کے
اوپر کو منہ اُٹھاتا ہے
مجھے محسوس ہوتا ہے
مدد کے واسطے اپنی
خدا کو یہ بُلاتا ہے
یہ اُس سے کر کے استغفار
حالِ دل سناتا ہے
Comment