Tweet
کدو
حدثنا عمرو بن علي، حدثنا أزهر بن سعد، عن ابن عون، عن ثمامة بن أنس، عن أنس، أن رسول الله صلى الله عليه وسلم أتى مولى له خياطا، فأتي بدباء، فجعل يأكله، فلم أزل أحبه منذ رأيت رسول الله صلى الله عليه وسلم يأكله.
ہم سے عمروبن علی نے بیان کیا ، کہا ہم سے ازہر بن سعد نے بیان کیا ، ان سے ابن عون نے ، ان سے شمامہ بن انس نے اور ان سے حضرت انس رضی اللہ عنہ نے کہ رسول اللہ صلی اللہ علیہ وسلم اپنے ایک درزی غلام کے پاس تشریف لے گئے ، پھر آپ کی خدمت میں ( پکا ہوا ) کدو پیش کیا گیا اور آپ اسے ( رغبت کے ساتھ ) کھانے لگے ۔ اسی وقت سے میں بھی کدو پسند کرتا ہوں کیونکہ حضور اکرم صلی اللہ علیہ وسلم کو اسے میں نے کھاتے ہوئے دیکھا ہے ۔
تشریح :
ایک روایت میں ہے کہ حضرت انس رضی اللہ عنہ کدو کھاتے اور کہتے تو وہ درخت ہے جو مجھ کو بہت ہی زیادہ محبوب ہے کیونکہ آنحضرت صلی اللہ علیہ وسلم تجھ سے محبت رکھتے تھے۔ امام احمد نے روایت کیا ہے کہ کدو آپ کوسب کھانوں میں زیادہ پسند تھا۔ حضرت عائشہ رضی اللہ عنہا نے روایت کیا کہ رسول کریم صلی اللہ علیہ وسلم نے فرمایا ہانڈی میں کدو زیادہ ڈالو اس سے آدمی کا رنج دفع ہو تا ہے۔ ایک حدیث میں ہے کدو اور خرما وہ دونوں جنت کے میوے ہیں۔ ایک حدیث میں ہے کہ کدو سے دماغ کو طاقت ہوتی ہے۔ ایک حدیث میں ہے کہ کدو بصارت کو قوی کرتا ہے اور قلب روشن کرتا ہے
پکانے کا ایک طریقہ
کدو اگر اکیلا بنانا ہو تو دیگچی میں حسب ذائقہ تیل ڈالیں، جب گرم ہو جائے تو ایک چائے کا چمچ زیرہ ڈالیں، جیسے ہی بھن جائے تو باریک اور لمبی کٹی ہوئی پیاز ڈال دیں۔ جب پیاز نرم ہوجائے۔ گولّڈن نہیں نرم، تو کٹے ہوئے کدو ڈال دیں۔ اب یہ نہ پوچھئے گا کہ کاٹنا کیسے ہے؟
اب کدو بھون لیں اور ساتھ ہی حسب ذائقہ نمک مرچ ڈال لیں۔ اگر لہسن ادرک پیسٹ ہے تو ایک چمچ ڈالیں ورنہ ثابت لہسن باریک باریک سلائس کاٹ کر ڈال لیں۔اب جب کدو ذرا بھن جائیں، کچھ نرم سے ہو جائیں تو دو سے تین ٹماٹر کاٹ کر ڈال دیں اب اسے مکس کر کے ڈھکن ڈھک کر دم پر رکھ دیں۔یہ دم پر ہی گل جاتے ہیں۔ اگر زیادہ نرم گلاوٹ چاہئے تو دم پر رکھنے سے قبل ایک کپ پانی بھی ڈال سکتے ہیں۔ان شاللہ جلد ہی سالن تیار ہو جائے گا ۔جو کہ ایک اچھی مہک اور مزے دار ہوگا۔
10-10 منٹ بعد چیک ضرور کرتے رہیں ورنہ کوئی اور مہک بھی شامل ہو سکتی ہے۔؟ ابتسامہ
اگر گوشت میں بنانا ہو تو گوشت پیاز نمک مرچ لہسن ادرک اور پانی ڈال کر گلائیں۔ پھر اس میں حسب ضرورت تیل ڈال کر اور دو تین ٹماٹر کاٹ کر بھونیں۔ جب پانی خشک ہو جائے تیل اوپر آجائے اور سب کچھ یک جان ہو جائے تو کٹے ہوئے کدو ڈال دیں۔اب ذرا سا مکس کریں کہ تمام مصالحے کدو میں رچ جائیں پھر گلانے کیلئے پانی ڈالیں اور دم پر رکھ دیں۔کچھ دیر میں کدو گل جائیں گے اور تیل اوپر آجائے گا۔ تھوڑا سا پانی رہنے دیں اگر بالکل خشک نہیں بنانا تو۔بس دو چار بار چلائیں تاکہ سب کچھ یک جان ہو جائے، اور جب ہو جائے تو چولہا بند کر دیں۔مزے اور چسکے والا سالن گوشت کدو تیار ہوگا۔ان شاءاللہ
بشکریہ ام طلحہ
Comment