Tweet
آساں وی عیدیں تے عید منگدوں
میڈا مولا !
پڑهیا وی هسے ، سنڑیا وی ہسے
جو پیارے موسی دی ساری امت
توڑے جو باغی ہائی... لاڈلی ہائی ..!!
انہیں تے عیداں عنایتاں ہن ، انہیں دے کیتے رعایتاں ہن...
روز عیداں کریندے ہن او
انہیں دے کیتے تیڈے لنگر توں ،سویل کوں وی تے شام کوں وی ، جو من و سلویٰ دے طشت در طشت ، آسمانیں تو لہہ آندے ہن....
ول وی تیں تو او راضی نہ.ہن.....
اے میڈے مولا..!
آساں وی بندے ہیں تیڈے مولا
آساں وی تیڈے حبیب سوهنڑے دے امتی ہیں..
تیں جیندے خاطر جہان جوڑیے
زمین تے آسمان جوڑیے
آساں وی امت شمار ہیں پئے
آساں وی عرضی گذار ہیں پئے
ساکوں تاں عیدیں تے ڈکهه اے راہندے
اساڈو عیداں جڈاں جو آندن
ہزار مونجهاں سلاڑهه آندن
اے عیداں آندن ، تاں ساڈے بالیں دیں حسرتیں کوں روا ویندیاں ہن....
اے سوهنڑاں رب آ.... !
اساڈی من چا
جو پورے سال ءچ فقط ڈو عیدیں تے من و سلویٰ نہ بهیج بے شک..
مگر اے چھوٹی جهئیں التجا هے
جو عید چھوٹی تے میڈا مولا.....
اے نویں کپڑے ، نکور جتیاں
رسیلیاں سیواں تے کچا بستہ
رنگ برنگے غبارے وی کجهه
آپو آپ ای لہا چهوڑیے کر...
تے عید وڈی جڈاں جو آوے
ساڈے بالیں دی پهوت کیتے
نکا جهیہاں ، هک سنگریا لیلا
آپو آپ ای ڈوا پٹهیا کر.....!!
اساں تاں چهیکڑ ہیں امتیں دی
اساں قیامت دے نال ہیں پئے
اساں دو آپڑاں دھیان کر چا...
آساں دو آپڑاں حسان کر چا
اساں وی عیدیں تے عید منگدوں....
اساں وی عیدیں تے عید منگدوں...
خالد پرویز