Tweet
اپنے ماضی کے تصوّر سے ہراساں ہوں میں
اپنے گزرے ہوئے ایّام سے نفرت ہے مجھے
اپنی بیکار تمناؤں پہ شرمندہ ہُوں میں
اپنی بےسُود امیدوں پہ ندامت ہے مجھے
میرے ماضی کو اندھیرے میں دبا رہنے دو
میرا ماضی میری ذلّت کے سوا کچھ بھی نہیں
میری امیدوں کا حاصل میری کاوش کا صِلہ
اک بےنام اذیّت کے سوا کچھ بھی نہیں
کتنی بےکار اُمیدوں کا سہارا لے کر
میں نے ایوان سجائے تھے کسی کی خاطر
کتنی بے ربط تمناوٓں کے مبہم خاکے
اپنے خوابوں میں بسائے تھے کسی کی خاطر
مجھ سے اب میری محبّت کے فسانے نہ کہو
مجھ کو کہنے دو کہ میں نے انہیں چاہا ہی نہیں
اور وہ مست نگاہیں جو مجھے بھول گئیں
میں نے ان مست نگاہوں کو سراہا ہی نہیں
مجھ کو کہنے دو کہ میں آج بھی جی سکتا ہُوں
عِشق ناکام سہی زندگی ناکام نہیں
ان کو اپنانے کی خواہش انہیں پانے کی طلب
شوق بیکار سہی سعئ غم انجام نہیں
وہ گیسو وہی نظریں وہی عارض وہی جسم
میں جو چاھوں کہ مجھے اور بھی مِل سکتے ہیں
وہ کنول جن کو کبھی ان کے لیے کھِلنا تھا
ان کی نظروں سے بہت دُور بھی کھل سکتے ہیں
ساحر لدھیانوی