Tweet
ایک ننّھی سی اُمیّد
اب تو شہر میں لَوٹ آئے ہو
اب تو سب لمحے اپنے ہیں
کیا اب بھی کم فرصت ہو؟
ہاں لمحوں کی تیز روی نے
مجھ کو بھی سمجھایا ہے
دن کے شور میں اپنی صدا گم رہتی ہے
لیکن شام کا لہجہ تو سرگوشی ہے
جِم خانے کی گہر ی رات کی انگوری بانہوں میں آنے سے پہلے
جب وہسکی آنکھوں میں ستارے بھردے
اور سرشاری
بُھولے بھٹکے رستوں کے
وہ سارے چراغ جلادے
جو تم ہوا سے لڑ کر روشن رکھّا کرتے تھے
کیا کوئی کرن ننھّی سی کرن میری ہوگی؟
پروین شاکر