Tweet
طیبہ نوں جان والے سن میریاں صداواں
فریاد کردیاں نے بے چین اے نگاہواں
طیبہ دے اے مسافر پہنچے تو جد مدینے
روضے دیاں تو لاویں جد جالیاں نو سینے
میری وی حاضری لئی رورو کریں دعاواں
طیبہ نوں جان والے سن میریاں صداواں
خوش بخت عاشقاں دا جس دم شمار ہووے
فہرست زائراں دی در تے تیار ہووے
کردیو اوس ویلے تو پیش میرا ناواں
طیبہ نوں جان والے سن میریاں صداواں
خورے کدوں بلانا محبوب دے مدینے
شوق زیارتاں نے آتش ہے لائی سینے
تڑپا دیاں نے مینوں طیبہ دیاں ہواواں
طیبہ نوں جان والے سن میریاں صداواں
اے کاش جاگ جاون ستے نصیب میرے
صد لیں جے مدینے آقا حبیب میرے
آقا نوں جاکے رورو سب حال دل سناواں
طیبہ نوں جان والے سن میریاں صداواں
کڈی اُبال دل دے چوکھٹ تے سر نوں دھر کے
پلکاں تے موتیاں دا نذرانہ پیش کرکے
حافظ دیاں وی رورو بخشاں لویں خطاواں
طیبہ نوں جان والے سن میریاں صداواں
Comment