mera ghaflat main dooba dil badal day

[.]

mera ghaflat main dooba dil badal day

بدل دے دل کی دنیا دل بدل دے
میرا غفلت میں ڈوبا دل بدل دے

ہوا و حرص والا دل بدل دے
میرا غفلت میں ڈوبا دل بدل دے

بدل دے دل کی دنیا دل بدل دے
خدایا فضل فرما دل بدل دے

گناہ گاری میں کب تک عمر کاٹوں
بدل دے میرا رستہ دل بدل دے

سنوں میں نام تیرا دھڑکنوں میں
مزا آجائے مولا دل بدل دے

ہٹا لوں آنکھ اپنی ما سوا سے
جیوں میں تیری خاطر دل بدل دے

کروں قربان اپنی ساری خوشیاں
تو اپنا غم عطا کر دل بدل دے

سہل فرما مسلسل یاد اپنی
خدایا رحم فرما دل بدل دے

پڑا ہوں تیرے در پر دل شکستہ
رہوں کیوں دل شکستہ دل بدل دے

تیرا ہوجاوں اتنی آرزو ہے
بس اتنی ہے تمنا دل بدل دے

میری فریاد سن لے میرے مولا
بنا لے اپنا بندہ دل بدل دے

دلِ مغموم کو مسرور کردے
دلِ بے نور کو پُر نور کردے

فروزاں دل میں شامِ طور کردے
یہ گوشہ نور سے معمور کردے

میرا ظاہر سنور جائے الٰہی
میرے باطن کی ظلمت دور کردے

ہے میری گھات میں خود نفس میرا
خدایا اس کو دے مقدور کردے

بدل دے دل کی دنیا دل بدل دے
میرا غفلت میں ڈوبا دل بدل دے

جو کروں دیدار تیرا روزِ محشر
تو دیکھے مسکرا کر دل بدل دے

بدل دے دل کی دنیا دل بدل دے
میرا غفلت میں ڈوبا دل بدل دے