Tweet
جو مُجھے بُھلا دیں گے ــ مَیں اُنھیں بُھلا دُوں گا
سب غرور اُن کا مَیں ــ خاک میں مِلا دُوں گا
دیکھتا ہُوں سب شکلیں ـ ـ سُن رہا ہُوں سب باتیں
سب حساب ان کا مَیں ــ ایک دِن چُکا دُوں گا
روشنی دِکھا دُوں گا ـ ـ ان اِندھیر نگروں میں
اِک ہَوا ضیاؤں کی ــ چار سُو چَلا دُوں گا
بے مثال قریوں کے ـ ـ بے کنار باغوں کے
اَپنے خُواب لوگوں کے خُواب میں دِکھا دُوں گا
مَیں مُنیرؔ جاؤں گا ایک دِن اُسے ملنے
اُس دَر پہ جا کے مَیں ــ ایک دِن صدا دُوں گا
شاعر : مُنیرؔ نیــازی
مجموعہ کلام : آغازِ زمستاں میں دوبارہ