Tweet
اشک آنکھوں میں چُھپاتے ہُوئے تھک جاتا ہُوں
بوجھ پانی کا اُٹھاتے ہُوئے تھک جاتا ہُوں
پاؤں رکھتے ہیں جو مجھ پر اُنھیں احساس نہیں
میں نِشانات مِٹاتے ہوئے تھک جاتا ہُوں
برف ایسی کہ پگھلتی نہیں پانی بن کر
پیاس ایسی کہ بُجھاتےہُوئے تھک جاتا ہُوں
اچھی لگتی نہیں اِس درجہ شناسائی بھی
ہاتھ ہاتھوں سے مِلاتے ہُوئے تھک جاتا ہُوں
غم گُساری بھی عجب کارِ محبّت ہے کہ میں
رونے والوں کو ہنساتے ہُوئے تھک جاتا ہُوں
اتنی قبریں نہ بناؤ مِرے اندر مُحسن
میں چراغوں کو جلاتے ہُوئے تھک جاتا ہُوں
محسن نقوی
Comment