Tweet
راحتِ دل ، متاعِ جاں ھے تُو
اے غمِ دوست جاوداں ھے تُو
آنسوؤں پر بھی تیرا سایہ ھے
دھوپ کے سر پر سائباں ھے تُو
دل تری دسترس میں کیوں نہ رھے
اس زمیں پر تو آسماں ھے تُو
شامِ شہر اداس کے والی
اے مرے مہرباں !! کہاں ھے تُو ؟؟
سایۂ ابرِ رائیگاں ھُوں میں
موجِ بحرِ بیکراں ھے تُو
میں تہہِ دست وگرد پیرہن
لعل و الماس کی دکاں ھے تُو
لمحہ بھر مل کے روٹھنے والے
زندگی بھر کی داستاں ھے تُو
کفر و ایماں کے فاصلوں کی قسم
اے متاعِ یقین و گماں ھے تُو
تیرا اقرار ھے ، نفی میری
میرے اثبات کا جہاں ھے تُو
جو مقدر سنوار دیتے ہیں
ان ستاروں کی کہکشاں ھے تُو
بے نشاں ، بے نشاں خیام میرے
کارواں کارواں ، رواں ھے تُو
جلتے رہنا چراغ آکرِ شب
اپنے محسن کا رازداں ھے تُو
”مُحسن نقوی“