غم سے چھوٹوں ، تو ادھر دیکھوں میں

[intelligent086]

غم سے چھوٹوں ، تو ادھر دیکھوں میں

دل کو رو لوں تو جگر دیکھوں میں

نگہِ یاس اثر دیکھوں میں
دامنِ یار بھی تر دیکھوں میں

آشیاں کے جو اٹھا لوں تنکے
اپنے ٹوٹے ہوئے پر دیکھوں میں

داغ ہی داغ نظر آتے ہیں
کس طرح قلب و جگر دیکھوں میں

دم گھٹا جاتا ہے،اے دستِ جنوں!
چاکِ دامانِ سحر دیکھوں میں

نہ وہ محفل ہے، نہ وہ پروانے
خاک، اے شمع ِ سحر، دیکھوں میں

نزع میں ڈھونڈ رہی ہیں آنکھیں
کاش! انہیں ایک نظر دیکھوں میں

دل ِ دیوانہ، یہ قسمت میری
کہ تجھے خاک بسر دیکھوں میں

چھوٹ جاؤں جو غم ِ ہستی سے
بھول کر بھی نہ ادھر دیکھوں میں
٭٭٭