Tweet
ہر شخص کی خُوں رنگ قبا ہے کہ نہیں ہے
یہ قتل گہِ ِاہلِ وفا ہے کہ نہیں ہے
محرومِ جواب آتی ہے فریاد فلک سے
ان ظلم نصیبوں کا خُدا ہے کہ نہیں ہے
اے قریۂ بے خوابِ تمنا کے مکینو
اس راہ کا اُس کو بھی پتا ہے کہ نہیں ہے
اک ریت کا دریا سا ادھر بھی ہے اُدھر بھی
صحرائے محبت کا سرا ہے کہ نہیں ہے
آنکھوں کے لئے خواب ہیں شبنم کے لئے پھول
ہر چیز یہاں رشتہ بپا ہے کہ نہیں ہے
اک نسل کی تعزیر سہیں دوسری نسلیں
اے منصفِ بر حق یہ ہوا ہے کہ نہیں ہے
بے رنگ ہوئے جاتے ہیں آنکھوں کے جزیرے
طوفان کی یہ آب و ہوا ہے کہ نہیں ہے
امجدؔ جو رکا اس کی صدا پر نہ چلا پھر
انسان کا دل کوہِ ندا ہے کہ نہیں ہے
Amjad islam Amjad