Jinhain main dhundhta tha aasmanon main zaminon main

[.]

Jinhain main dhundhta tha aasmanon main zaminon main

Wo nikale mere zulmat-e-khana-e-dil ke makinon main

mahine vasl ke ghariyon ki suurat urtay jate hain

magar ghariyan judai ki guzarti hain mahinon main

mujhe rokega tu ae na-khuda kya gharq hone se

ki jin ko doobna hai doob jate hain safinon main

jala sakti hai sham-e-kushta ko mauj-e-nafas un ki

ilahi kya chuupa hota hai ahl-e-dil ke sinon main

tamana dard-e-dil ki ho to kar khidamat faqiron ki

nahin milta ye gauhar baadshahon ke khazinon main

muhabbat ke liye dil dhoond koi tootnay wala

ye vo mai hai jise rakhte hain nazuk aaab-ginon main

bura samajhon unhain mujh se to aisa ho nahin sakta

ke main khud bhi to huun "Iqbal" apne nukta-chinon main

(By Allama Muhammad Iqbal)