" badal rahe haiN sabhee sitaare madaar apnaa "

[Ismail Ajaz]

Khayaal apnee taKhleeq ke saath PeGham aur urdu ke chaahne waaloN kee Khidamt meN aadaab ke saath apnaa kalaam pesh kartaa hai

Arz e Khidmat hai

suKhanwaroN meN karo naheeN tum shumaar apnaa
keh dil peh raihtaa naheeN hai phir iKhtiyaar apnaa

Khud apnee tauSeef o AzmatoN par QaSeede likh kar
yuN shaaEroN ne lagaa liyaa ishtihaar apnaa

tum apnee qismat ko aazmaaow keh waqt hai yeh
" badal rahe haiN sabhee sitaare madaar apnaa "

muHabbatoN meN KhulooS shaamil karow keh abb tow
GharaZ ne qaa'im kiyaa huwaa hai HiSaar apnaa

tumaare aane se ghar meN har soo bahaar thee aur
tumaare jaane se luT gayaa hai qaraar apnaa

chaman guloN se mahek rahaa hai sajee hai dhartee
KhizaaN ko jalwah dikhaa rahee hai bahaar apnaa

mire raqeeboN kaa saath detaa hai aa'inah bhee
kaho yeh paikar paree se roke siNghaar apnaa

nazar milaa ke nazar ke pyaaloN ke jaam bhar dow
utar nah jaa'ey "Khayaal" dil se Khumaar apnaa

Ismail Ajaz Khayaal