taraHee Ghazal urduanjuman maiHfil e peGhaam kee nazr

[Ismail Ajaz]

aihl e bazm ko aadaab,meree 24veN mushaa'ire ke liye ek kaavish urduanjuman ke liye jo maiN peGhaam ke tamaam paRhne waaloN chaahne waaloN kee nazr kartaa hooN

arz kiya hai

yeh hai kis taraH ki ulfat jo payaam tak nah pohNche
tu miree galee se guzre tow salaam tak nah pohNche
mire dil ke sab dareeche tiree chaah meN khule haiN
tiree Khushbu'oN ke jhoNke mere baam tak nah pohNche

mire seene meN jo dil hai tire naam se hee dharke
tire dil kee dhaRkanoN ko yeh payaam tak nah pohNche
miree aankhoN ke jazeere miree yaadon ke samandar
tire dil ke saaHiloN peh kisee shaam tak nah pohNche

miree tishnagee baRhaa kar tujhe mil rahee hai raaHat
"tiraa haath Zindagee bhar kabhee jaam tak nah pohNche"
tu bhee roz mujh ko dekhe tu bhee roz mujh ko tarse
tire lab peh aaey shikwah tow kalaam tak nah pohNche

miree zeest ke safar meN mire aas paas manzil
mire saath chal rahee hai jo qayaam tak nah pohNche
maiN "Khayaal" jee rahaa hooN bhalaa kaun se nagar meN
jahaaan apnee jaaN kee qaamat SaHeeH daam tak nah pohNche


Ismail ajaz Khayaal