Tweet
حریت فکر
کتنے چپ چاپ چراغوں کے دھوئیں سے میں نے
اپنے افکار کا موہوم ہیولیٰ ڈھالا
کتنے بجھتے ہوئے چہروں کے عرق سے میں نے
برسوں فردا کا لچکتا ہوا پودا پالا
کتنی معجوب نگاہوں کی شعاعیں لے کر
اپنے ظلمت زدہ احساس کو دیکھا بالا
کتنے مرتاض فقیہوں کے عقیدے رٹ کر
اپنے ایمان پہ ادراک کا پر تو ڈالا
کھول کر کتنے ہی انفاس کے ژولیدہ تار
دل کے بکھرے ہوئے منکوں کی پروئی مالا
عزم اس طرح خیالوں میں ضیا بار رہا
جیسے تاریکی صحرا میں چراغ لالہ
اس مشقت سے مگر آج بھی بے پرواہ ہے
دامن صبح سے تاروں کو بجھانے والا
راہ الفت میں حمیت کو لٹانے پر بھی
میری کمزور امنگوں کو سہارا نہ ملا
کتنے مہکےہوئے محلوں سے ہوا میرا گزر
کسی محفل میں مگر انجمن آرا نہ ملا
ڈھونڈ لی کرہ خاکی کی طنابیں میں نے
آسمانوں سے مگر کوئی اشارہ نہ ملا
جس کی لبروں سے جبینوں کی سیاہی دھلتی
مجھ کو اُس آتش سیال کا دھارا نہ ملا
کتنی پرہول خلیجوں سے گزر کر بھی مجھے
اپنی ہستی کے سمنرر کا کنارہ نہ ملا
اپنے اسلاف کی تاریخ کو چھانا پھٹکا
گرم تھی راکھ مگر کوئی شرار نہ ملا
افق دل پہ وہ گھنگھور گھٹا گھرتی رہی
کہ مجھے رات کو بھی کوئی ستارہ نہ ملا
اب محسوس ہوا کہ مری مجبوری
مرے سمٹے ہوئے ماحول کا افسانہ ہے
ان صداوں سے تو دریوزہ گری ہی بہتر تھی
مری فریادکی بنیاد کلیمانہ ہے
کیسے مانوں کہ یہ فانوس ہے یا منبع نور
جب مرے سامنے خاکستر پروانہ ہے
اف یہ سہمی ہوئی راتیں یہ ترستے ہوئے دن
میری دنیا کا ہر انداز گدایانہ ہے
سجدہ گاہوں کی سلاسل ہیں خیالوں کے فریب
ان نگاہوں میں نہ کعبہ ہےنہ بت خانہ ہے
اک نئے شوق سے لبریز ہے پیمانہ دل
اب نہ وہ جام نہ وہ جلوہ جانانہ ہے
المدد اے میرے پرواز کے رنگین خوابو
مجھ کو صدیوں کے دھندلکوں سے پرے جانا ہے
رقص کے ساتھ اگر ساز کی جھنکار نہ ہو
تو اک الجھی ہوئی زنجیر ہے یہ فن سلیم
حسن کے پاس اگر عشوہ صد رنگ نہ ہو
اس سے بہتر ہے کہیں دشت کے پھولوں کی شمیم
زیست کی راہ میں اگر خطرے نہ منڈلائیں
تو یہ انفاس کے تاروں کی ہے بوسیدہ گلیم
ایک مرکز پہ گھمائوں گا نظام کونین
کہ کسی کا بھی نہیں دعوی شاہی تسلیم
یہ کہیں حریت فکرکی آواز نہ ہو
قصر فردا سے مجھے کون بلاتا ہےندیم
:)
Comment