Tweet
Waqt k uljhe uljhe dhage.
Jab dil tor k chal den ge.
Pagdandi par peele patte tum ko tanha dekhen ge.
Perhon k seene par likhe nam bhi ho jaen tehleel.
Or hawa bhi simt ko apni kar jaye tabdeel.
Bheeni bheeni khushbu hum ko har ik gaam pukare gi.
Kar k yakh basta jab hum ko barf us paar sudhare gi.
Dhoop sadaon k sikke jab kanon min khankae gi.
Girja ghar ki oonchi barji chaand ka chehra choome gi.
Barish, muskanon k moti pathar par jab phore gi.
Or barasti boondon k dharon par dhare jore gi.
Garm garm, angaron jese ansu ankh se ublen ge.
Dil k arman ik mddat k bad tarap kar niklen ge.
Jab ehsas ki dunya min phir or na ghungroo chhanken ge.
Sirf khamoshi goonje gi, tab ane wale mosam ki.
Khirki par dastak bhi na hogi kisi surili rim jhim ki.
Sham k sannate min badan par coat tumhara jhoole ga.
Yadon ka lams tatole ga, ghoor udasi chhu le ga.
Oonchi oonchi baton se tum khamoshi min shor karo ge.
Geet purane sun kar thandi sansen bhar kar bhor karo ge.
Us pal shab ki tanhai min apne dil ko shad karo ge.
Bolo, mujh ko yad karo ge?
Comment