Tweet
یہ تاکید محبت ہے
یا تجدید محبت ہے
مگر جو کچھ بھی ہے جاناں
یہ توحید محبت ہے
سنو توحید محبت میں بچھڑنے کا کبھی دھڑکا نہیں ہوتا
بجُز چاہت کسی دل میں کوئی جذبہ نہیں ہوتا
کبھی تاکید یا تجدید کی نوبت نہیں آتی
کوئی کاغذ، کوئی خط، پھول یا تحفہ نہیں ہوتا
میری آنکھوں میں جتنے رنگ ہیں
ان سب میں چاہت ہے
میرے ہونٹوں پہ جتنے لفظ ہیں
ان میں عقیدت ہے
تمہیں معلوم ہے ، چاہت تو اک ایسی حقیقت ہے
جسے لفظوں، خطوں، پھولوں یا تحفوں کی
ضرورت ہی نہیں ہوتی
جہاں دل سے نکل کر بات
خود دل تک پہنچتی ہے
جہاں آنکھوں سے نکلے اشک
خود اظہار کرتے ہیں
کہ ہم کس حال میں ہیں
اور کتنا پیار کرتے ہیں
سو! اے جان غزل دیکھو
میری آنکھیں، دھڑکتا دل اور اس میں موجزن جذبے
میری چاہت کا تحفہ ہیں
میری چاہت کے سب تحفے
تمہارے پاس ہیں جاناں
مجھے یوم محبت پر
تمہیں کچھ بھی نہیں دینا
Comment