Tweet
تیری سانسوں میں رفو شام میں رکھا ہوا میں
اِک دیا وقت کے اہرام میں رکھا ہوا میں
تو سمندر کے کسی خواب کا اوڑھا ہوا دن
اور تہہِ وحشتِ صد کام میں رکھا ہوا میں
میں ترے شہر کے موسم کی کسی شام کا دُکھ
اور کسی کوچۂ گمنام میں رکھا ہوا میں
شب کی دیوار سے لپٹی ہوئی آکاس کی بیل
اور یادوں کے دروبام میں رکھا ہوا میں
تو مِری ذات کے مندر میں بھٹکتی ہوئی چیخ
اور اس چیخ کے کہرام میں رکھا ہوا میں
میں تری یاد کے پہلو میں گزارا ہوا دن
اور تری زلفِ سیاہ فام میں رکھا ہوا میں
Comment