Aaj ki aurat hoon main !!!

[Mahvish Waqas]

Aaj Ki Aurat Hoon Mai !!!
Aaj Ki Aurat Hoon Mai !!!
Dehleez par khari hoon mai,
ek paoon bahir hai,
Doosra andar hi hai.
*************************
Ek paoon bahir hai,
Khuwab se saja howa,
Doosra andar kahin,
Azab se jura howa,
Peeche mur kar dekhne ka,
Hosla nahi hai ab,
Aage khar-zaar hai,
Dil bhi taar taar hai,
Aur ana ka saath hai,
Ke Aaj Ki Aurat Hoon Mai !!!
************************
Ek Haath par sooraj hai,
Doosre par chand hai,
Aur kandhon par dhara,
Yeh sakht aur be-meher,
Zameen ka sayara hai,
Be-karaan kinara hai,
Dard be-hisaab hai,
Zakhm be-naqaab hai,
Aur ana ka saath hai,
Aagahi ka azab hai.
**********************
Kese kahoon ke kis qadar,
Yeh aagahi azab hai,
Be-shumar sadiyon ka,
Shayad yahi nisaab hai,
Jabar mai dhala howa,
Sabar se dhula howa,
Khud-shanaas lamhoon ka,
Be-aman khiraaj hai,
kirchiyon ki baat hai,
Ek Akeli zaat hai,
Sab jama tafreeq ki,
Ek si taqseem hai,
Baqi sab bahana hai,
Zindagi bitana hai,
Peeche bawarchi-khana hai,
Saamne zamana hai,
Dehleez par khari hoon mai,
Aaj Ki Aurat Hoon Mai !!!

[thefire1]

Re: Aaj ki aurat hoon main !!!

Kia baat hay janab bohat khoob, maazi, haal aur mustaqbil kay lamhat bayan karti hoyee yeh tehreer waqayi baRay khoobsurat andaz main lafzoon ki laRi say piroyee hoye hay.. Aaj ki aurat main himmat bhi hay, ghuroor bhi, gham bhi hay, khushi bhi hay, hosla bhi hay, qarb bhi hay, khushi bhi hay aur sab say baRi baat zindagi bitanay ka jazba bhi hay... bohat achay, yeh PEGHAM sab kay liye hay..... aur itnay saaray ehsaasat ko apnay nazuk say dil main aik auraat hi jagah day sakti hay... Bohat Khoob and keep sharing your wonderful thoughts with us :) Khush Rahyeh

[Mahvish Waqas]

Re: Aaj ki aurat hoon main !!!

Assalam o alaikum wr wb..

Intikhab pasand karnay ka shukria..
Khush rahain..