Tweet
kab tak dil ki Khair manaayen, kab tak raah dikha'o ge
kab tak chain ki mohalat do ge, kab tak yaad na aao ge
biitaa deed umeed kaa mausam, Khaak udatii hai aankhon mein
kab bhejoge dard kaa baadal, kab barkhaa barasa'o ge
ahad-e-vafaa aur tark-e-muhabbat jo chaaho so aap karo
apane bas ki baat hi kyaa hai, hamase kyaa manva'o ge
kis ny vasl kaa suraj dekhaa, kis par hijr kii raat Dhalii
gesuon vaale kaun the, kyaa the, un ko kyaa jatala'o ge
Faiz dilon ke bhaag mein hai ghar basanaa bhi luT jaanaa bhi
tum us husn ke lutf-o-karam par kitane din itara'o ge
Comment