♠ Untitled ♠

[~Stranger~]

Dilo'n Ko Chhaid Ker Rakh Dain Jo, Un Lafzon Se Khaa'if Hoon
Kisi Masoom Per Banti Hui Baton Se Khaa'if Hoon

Wo Jin Ki Aanch Se Dil Ke Kanwal Murjha Ke Reh Jayen
Main Aisay Garm, Jhulsaye Huay Lehjon Se Khaa'if Hoon

Kisi Ko Zaat Se Meri Koi Takleef Na Pohnchay
Mujhe Pyaray Hain Jo Main Unn Sabhi Rishto'n Se Khaa'if Hoon

Unhain Her Aik Se Her Pal, Gilay Shikway He Rehtay Hain
Anaa Ki Jaal Main Jakray Huay Logon Se Khaa'if Hoon

Kaduurat Dil Main Hai To Phir Kisi Pal Waar Ker Dain Ge
Naqaab-e-Dosti Daalay Huay Chehro'n Se Khaa'if Hoon

Ye Maana Mainay Jazba'haye Dil Anmol Hotay Hain
Magar Bay'mol Jo Ker Dain Main Unn Jazbo'n Se Khaa'if Hoon

Bikher Jaye Koi To Phir Samaita Jaa Nahi Sakta
Mujhe Jo Muntashir Ker Dain Unhi Socho'n Se Khaa'if Hoon

Zamanay Bhar Main Meray Dard Ki Tash'heer Ker Dain gey
Main Gham'khuaro'n Se, Hamdardi Se, Hamraazo'n Se Khaa'if Hoon

Mujhe Bay'dast-o-Paa Ker Ke Kaheen Aagay Na Barh Jayen
Main Apni Zindagi Ke Bhagtay Lamhon Se Khaa'if Hoon

Mujhe Bay'chargi Se Bay'basi Se Khauf Aata Hai
Saharay K Leay Phailay Huay Haathon Se Khaa'if Hoon

Jo Hasrat Main Badal Ker Zindagi Ka Rog Ban Jayen
Main Aisi Khuahisho'n Aise Tamana'on Se Khaa'if Hoon

Ye Panjay Gaar Dain Jis Jaa, Wahan Kuch Bhi Nahi Rehta
Main Apne Chaar'soo Phailee Hui Rasmo'n Se Khaa'if Hoon

Kaheen Paas-e-Murawwat Hai Kaheen Ehsas-E-Ghairat Hai
Kabhi Apno'n Se Khaa'if Hoon, Kabhi Ghero'n Se Khaa'if Hoon

Jahan Na Chain Din Ko Ho Na Raatain Pur'sukoon Guzrain
Sabhi Aisay Makaano'n Aur Shabistaano'n Se Khaa'if Hoon

Khuda Haami Hai Apna, Ye Yaqeen To Hai Magar Phir Bhi
Daroo'n Khaana Main Jo Paltay Hain Unn Fitno'n Se Khaa'if Hoon

Nazar Her Gaam pur Dilkash Manaazir Se Ulajhti Hai
Jo Manzil Se He Bhatka Dain Main Unn Raho'n Se Khaa'if Hoon

[khan khan]

Re: ♠ Untitled ♠

Bohat Khoob.