Tweet
ستاروں سے بھرا یہ آسماں کیسا لگے گا
ہمارے بعد تم کو یہ جہاں کیسا لگے گا
تھکے ہارے ہوئے سورج کی بھیگی روشنی میں
ہوائوں سے الجھتا بادباں کیسا لگے گا
جمے قدموں کی نیچے سے پھسلتی جائے گی ریت
بکھر جائے گی جب عمر رواں کیسا لگے گا
اسی مٹی میں مل جائے گی پونجی عمر بھر کی
گرے گی جس گھڑی دیوار جاں کیسا لگے گا
بہت اترا رہے ہو دل کی بازی جیتنے پر
زیاں بعد از زیاں بعد از زیاں کیسا لگے گا
وہ جس کے بعد ہوگی اک مسلسل بے نیازی
گھڑی بھر کا وہ سب شور و فغاں کیسا لگے گا
ابھی سے کیا بتائیں مرگ مجنوں کی خبر پر
سلوک کوچہ نامہرباں کیسا لگے گا
بتاو تو سہی اے جان جاں کیسا لگے گا
ستاروں سے بھرا آسماں کیسا لگے گا
Comment