NiceKhan_05's Collections

[nicekhan_05]

Aankh Se Door Na Ho Dil Se Utar Jaayegaa

Aankh se duur na ho dil se utar jaayegaa
Waqt kaa kyaa hai guzarataa hai guzar jaayegaa

Itanaa maanoos na ho Khilvat-e-Gam se apani
Tu kabhi Khud ko bhi dekhegaa to Dar jaayegaa

Tum Sar-e-Raah-e-Wafa dekhate reh jaaoge
Aur wo Baam-e-Rafaaqat se utar jaayegaa

Zindagi teri ataa hai to ye jaanevaalaa
Teri bakhshish teri dehleez pe Dhar jaayegaa

Doobate Doobate kashti to ochhaalaa de doon
Main nahin koi to saahil pe utar jaayegaa

Zabt laazim hai magar dukh hai qayaamat kaa 'Faraz'
Zaalim ab ke bhi na royegaa to mar jaayegaa

[nicekhan_05]

Re: Ahmed Faraz Best Collections

Ab Ke Ham Bichare To Shaayad Kabhi Khwaabon Main Millein

Ab ke ham bichare to shaayad kabhi Khwaabon main millein
Jis tarah sookhe hue phool kitaabon main millein

Dhoondh ujhrey hue logon main wafaa ke motii
Ye Khazaaney tujhe mumkin hai Kharaabon main millein

Too Khudaa hai na meraa ishq farishton jaisaa
Donon insaan hain to kyun itane hijaabon main millein

Gam-e-Duniyaa bhii Gam-e-Yaar main shaamil kar lo
Nashaa barhtaa hai sharaben jo sharaabon main millein

Aaj ham daar pe khenche gaye jin baaton par
Kyaa ajab kal wo zamaane ko nisaabon main millein

Ab na vo main hoon na tu hai na vo maazii hai `Faraaz'
Jaise do shaKhs tamannaa ke saraabon maim millein

[nicekhan_05]

Re: Ahmed Faraz Best Collections

Dost Ban Kar Bhii Nahin Saath Nibhaanevaalaa


Dost ban kar bhii nahin saath nibhaanevaalaa
Wohii andaaz hai zaalim kaa zamaanevaalaa

Ab ise log samajhate hain giraftaar meraa
Sakht nadiim hai mujhe daam mein laanevaalaa

Kyaa kahein kitane maraasim the hamaare is se
Wo jo ik shakhs hai moonh pheir ke jaanevaalaa

Tere hotey hue aa jaatii thii saarii duniyaa
Aaj tanhaa hoon to koii nahin aanevaalaa

Muntazir kis kaa hoon Tootii huii dehliz pe main
Koun aayegaa yahaan koun hai aanevaalaa

Main ne dekhaa hai bahaaron mein chaman ko jalate
Hai koii Khawaab kii taabiir bataanevaalaa

Kyaa Khabar thii jo merii jaan mein ghulaa hai itanaa
Hai wahii mujh ko Sar-e-Daar bhii laane vaalaa

Tum Taqalluf ko bhii IKhalaas samajhate ho 'Faraz'
Dost hotaa nahin har haath milaanevaalaa

[nicekhan_05]

Re: Ahmed Faraz Best Collections

Huii Hai Shaam To Aankhon Mein Bas Gayaa Phir Too


Huii hai shaam to aankhon mein bas gayaa phir too
Kahaan gayaa hai mere sheher ke musaafir too

Bahot udaas hai ik shaKhs tere jaane se
Jo ho sake to chalaa aa usii kii Khaatir too

Merii misaal ki ik Nakhl-e-Khushk-e-Sehraa hoon
Teraa Khayaal ki Shaakh-e-Chaman kaa taair too

Main jaanataa hoon ke duniyaa tujhe badal degii
Main maanataa hoon ke aisaa nahin bazaahir too

Hansii Khushii se bichhar jaa agar bichharnaa hai
Ye har muqaam pe kyaa sochataa hai aaKhir too

'Faraz' toone use mushkilon mein Daal diyaa
Zamaanaa Saahib-e-Zar aur sirf shaayar too

[nicekhan_05]

Re: Ahmed Faraz Best Collections

Qurbaton Mein Bhii Judaai Ke Zamaane Maange


Qurbaton mein bhii judaai ke zamaane maange
Dil vo bemehar ki rone ke bahaane maange

Apnaa ye haal ke jii haar chuke lut bhii chuke
Aur muhabbat wohii andaaz puraane maange

Ham na hote to kisii aur ke charche hote
Khalqat-e-Sheher to kehene ko fasaane maange

Dil kisii haal pe maane hii nahin Jaan-e-'Faraz'
Mil gaye tum bhii to kyaa aur na jaane maange

[nicekhan_05]

Re: Ahmed Faraz Best Collections

Ranjish Hii Sahii Dil Hii Dukhaane Ke Liye Aa


Ranjish hii sahii dil hii dukhaane ke liye aa
Aa phir se mujhe chhorr ke jaane ke liye aa

Pehle se maraasim na sahii phir bhii kabhii to
Rasm-o-Rahe duniyaa hii niibhaane ke liye aa

Kis kis ko bataayenge judaaii kaa sabab ham
Too mujh se Khafaa hai to zamaane ke liye aa

Kuchh to mere Pindaar-e-Muhabbat ka bharam rakh
Too bhii to kabhii mujh ko manaane ke liye aa

Ek umr say hoon Lazzat-e-Giriyaa se bhii maharoom
Aai Raahat-e-Jaan mujh ko rulaane ke liye aa

Ab tak Dil-e-Khush_Feham ko tujh se hain ummiiden
Ye aaKhirii shammen bhii bujhaane ke liye aa

Maanaa ki muhabbat kaa chhupaanaa hai muhabbat
Chupake se kisii roz jataane ke liye aa

Jaise tujhe aate hain na aane ke bahaane
Aise hii kisii roz na jaane ke liye aa

[nicekhan_05]

Re: Ahmed Faraz Best Collections

Sunaa Hai Log Use Aankh Bhar Ke Dekhte Hain


Sunaa hai log use aankh bhar ke dekhte hain
So us ke sheher mein kuchh din Theher ke dekhate hain

Sunaa hai rabt hai us ko Kharaab haalon se
So apane aap ko barbaad karake dekhate hain

Sunaa hai dard kii gaahak hai Chashm-e-Naazuk us kii
So ham bhii us kii galii se guzar kar dekhate hain

Sunaa hai us ko bhii hai Sher-o-Shaayarii se shagaf
So ham bhii mojaze apane hunar ke dekhate hain

Sunaa hai bole to baaton se phuul jharte hain
Ye baat hai to chalo baat kar ke dekhate hain

Sunaa hai raat use chaand taktaa rehtaa hai
Sitaare Baam-e-Falak se utar kar dekhate hain

Sunaa hai hashr hain us kii Gazaal sii aankhen
Sunaa hai us ko hiran dasht bhar ke dekhate hain

Sunaa hai din ko use titaliyaan sataatii hain
Sunaa hai raat ko jugnuu Theher ke dekhate hain

Sunaa hai raat se barh kar hain kaakulen us kii
Sunaa hai shaam ko saaye guzar ke dekhate hain

Sunaa hai us kii siyaah chashmagii qayaamat hai
So us ko surmaafarosh aankh bhar ke dekhate hain

Sunaa hai us kay labon se gulaab jalate hain
So ham bahaar par ilzaam dhar ke dekhate hain

Sunaa hai aainaa tamasaal hai jabin us kaa
Jo saadaa dil hain ban sanvar ke dekhate hain

Sunaa hai jab se hamaail hain us kii gardan mein
Mizaaj aur hii Laal-o-Gauhar ke dekhate hain

Sunaa hai Chashm-e-Tasawur se Dasht-e-Imkaan mein
Palang zaaviye us kii kamar ke dekhate hain

Sunaa hai us ke badan ke taraash aise hain
Ke phool apanii qabaayen katar ke dekhate hain

Wo Sarv-Qad hai magar Be-Gul-e-Muraad nahin
Ke us shajar pe shagoofe samar ke dekhate hain

Bas ek nigaah se lutetaa hai qaafilaa dil kaa
So Rah_Ravaan-e-Tamannaa bhii Dar ke dekhate hain

Sunaa hai us ke shabistaan se muttasil hai bahisht
Makiin udhar ke bhii jalve idhar ke dekhate hain

Ruke to gardishen us kaa tuwaaf karatii hain
Chale to us ko zamaane Theher ke dekhate hain

Kise nasiib ke Be-Pairahan use dekhe
Kabhii kabhii Dar-o-Diivaar ghar ke dekhate hain

Kahaaniyaan hi sahii sab mubaalaghe hii sahii
Agar vo Khawaab hai taabiir kar ke dekhate hain

Ab us ke sheher mein Theheren ki kuuch kar jaayen
'Faraz' aao sitaare safar ke dekhate hain

[nicekhan_05]

Re: Ahmed Faraz Best Collections

Tum Bhi Khafaa Ho Log Bhii Berham hain Dosto

Tum bhi Khafaa ho log bhii berham hain dosto
Ab ho chalaa yaqiin ke bure ham hain dosto

Kis ko hamaare haal se nisbat hai kyaa karen
Aankhen To dushmanon kii bhii purnam hain dosto

Apane siwaa hamaare na hone kaa Gam kise
Apanii talaash mein to ham hii ham hain dosto

Kuch aaj shaam hii se hai dil bhii bujhaa bujhaa
Kuch sheher ke chiraagh bhii maddham hain dosto

Is Sheher-e-Aarzoo se bhi baaher nikal chalo
Ab dil kii raunaqen bhii koii dam hain dosto

Sab kuchh sahii 'Faraz' par itanaa zaroor hai
Duniyaa mein aise log bahot kam hain dosto

[nicekhan_05]

Re: Ahmed Faraz Best Collections

Us Ko Judaa Hue Bhii Zamaanaa Bahot Huaa

Us ko judaa hue bhii zamaanaa bahot huaa
Ab kyaa kahen ye qissaa puraanaa bahot huaa

Dhaltii na thii kisii bhii jatan se Shab-e-Firaaq
Aai Marg-e-Naagehaan teraa aanaa bahot huaa

Ham Khuld se nikal to gaye hain par aai Khudaa
Itane se waaqaye kaa fasaanaa bahot huaa

Ab ham hain aur saare zamaane kii dushmaanii
Us se zaraa rabt barhaanaa bahot huaa

Ab kyun na zindagii pe muhabbat ko waar dein
Is aashiqii mein jaan se jaanaa bahot huaa

Ab tak to dil ka dil se taharruf na ho sakaa
Maanaa ki us se milanaa milaanaa bahot huaa

Kyaa kyaa na ham Kharaab hue hain magar ye dil
Aai Yaad-e-Yaar teraa Thikaanaa bahot huaa

Kehtaa thaa naasehon se mere moonh na aaiio
Phir kyaa thaa ek hoo kaa bahaanaa bahot huaa

Lo phir tere labon pe usii bewafaa kaa zikr
Ahmad 'Faraz' tujh se kahaa naa bahot huaa

[nicekhan_05]

Re: Ahmed Faraz Best Collections

Too Paas Bhii Ho To Dil Beqaraar Apanaa Hai

Too paas bhii ho to dil beqaraar apanaa hai
Ke ham ko teraa nahin intazaar apanaa hai

Mile koi bhii teraa zikr chher dete hain
Ke jaise saaraa jahaan Raazdaar apanaa hai

Wo door ho to bajaa Tark-e-Dosti kaa Khayaal
Wo saamane ho to kab ikhtiyaar apanaa hai

Zamaane bhar ke dukhon ko lagaa liyaa dil se
Is aas pe ke ik Gam_Gusaar apanaa hai

'Faraz' Raahat-e-Jaan bhii wohii hai kyaa kiijye
Wo jis ke haath se Seenaa_Figaar apanaa hai

[nicekhan_05]

Re: Ahmed Faraz Best Collections

Us Ne Kahaa Sun

Us ne kahaa sun
Ahed nibhaane kii Khaatir mat aanaa
Ahed nibhaanewaale aksar majabuurii yaa
Mahajuurii kii thakan se lautaa karate hain
Tum jaao aur daryaa daryaa pyaas bujhaao
Jin aankhon mein Doobo
Jis dil mein bhii utaro
Merii talab aawaaz na degii
Lekin jab merii chaahat aur merii Khwaahish kii lau
Itanii teiz aur itanii uunchii ho jaaye
Jab dil roude
Tab laut aanaa

[Muhammad Khalil]

Re: Ahmed Faraz Best Collections

Buhat hee khobsurat choice hay ap kee?

[جنیداختر]

Re: Ahmed Faraz Best Collections

acha collection hai aapka ka khan Sahib :)