Ghaflat-e-Yaar Kahan Tak Shab-e-Hijraan Kab Tak

[nicekhan_05]

Ghaflat-e-Yaar Kahan Tak Shab-e-Hijraan Kab Tak



dafn seene meN rakheN wasl ke armaaN kab tak
aatish e hijr jalayegi miri jaan kab tak

tangi e zeest ka ho jaye use kaash ahsaas
ghaflat e yaar kahaN tak shab e hijraaN kab tak

aaeenah bandi e dil kaGHzi gul se kijaaye
aik seHraa meN tamanna e gulistaaN kab tak

aoj per aaj he tuGHyani e beHr e jazbaat
aik kooze meN daba rakkhenge toofaaN kab tak

her ghaRi dil pay diye jaate heN dastak aalaam
bin bulaye chale aayenge yeh mehmaaN kab tak

ab woh KHamosh he , tha shab meN shareek e maatam
saath deta mira aaKHir dil e naalaaN kab tak

daafa e naar e shikam Arq e badan he jiska
pet per bandhega patthar wahi dehqaaN kab tak

le liya qatl ka ilzaam hameeN ne sar per
husn ko dekhte ab aur paraishaaN kab tak

jo nah milti hameN GHurbat meN husaini manzil
koo ba koo phirte younhi be sar o saamaaN kab tak
_____________

[nicekhan_05]

Re: Ghaflat-e-Yaar Kahan Tak Shab-e-Hijraan Kab Tak

KaheN Par Kho Diyaa Hai


Kiyaa terii refaaqat sey jo khud ko aashna maiN ne

Milaa kar khaak maiN dil ko, banaayaa naqsh-e-paa maiN ne!

Na karnaa thaa mujhe jo kuch, wahi aakhir kiyaa maiN ne

Piyaalaa zahr-e-ulfat ka, tiree khaaT^ir piyaa maiN ne

Mataaa'-e-dil se baRh kar bhi, bhalaa kuch hai zamaane maiN?
Nikaalaa jis ko seeney se, tujhii ko dey diyaa maiN ne!

Nikal kar zaat sey merii, howaa kuch aur bhi raushan!
Jalaayaa tha, Hareem-e-zaat maiN, jo ik diyaa maiN ne!

Banaayaa jaavidaaN, pal maiN, u'roos-e-zindagaani ko
Lahoo sey baaNdh kar apney, kaf-e-dil par Hinaa maiN ne!

Lagee hai aag maikhaaney maiN har soo, saaqiyaa kaisee?
Yeh madhoshi maiN, kis ka kardiyaa, phir tazkiraa maiN ne?

NigaahoN maiN tiree taSveer hai, aye ham-nawaa mere!
Banaayaa hai, jesey aaNkhoN maiN, faanoos-e-wafaa maiN ne!

Dikhaadii shaan, phir ahl-e-chaman ko, bey-niyaazi kii
Khamoshi sey jhaTak kar, aaj phir, dast-e-Sabaa maiN ne!

Sitam too ne, bahut mujh par, keye ham-dam , magar phir bhii
Zaraa itnaa bataa mujhko, kiyaa hai kab, gilaa maiN ne?

Sharaabii dil ne mujhko, kardiyaa bechain jab itnaa
Tiree aaNkhoN ke saaGhar maiN, banaayaa maikadaa maiN ne!

Tujhey ma'loom hii kyaa hai, Haqeeqat , Husn ki dil-bar ?
Tiree ik hii adaa par, kardiyaa thaa, dil , fidaa maiN ne!

KhaaN hai , HaaSil-e-bazm-e-gulistaan-e-dil-e-raNgeeN?
Jisey, SadyoN se le kar, aaj tak, dee hai , Sadaa maiN ne!

Koi jaa kar :Janu: keh dey, yeh mere dard-mandoN se

KaheN par kho diyaa hai, koocha-e-dil ka pataa maiN ne!

[nicekhan_05]

Re: Ghaflat-e-Yaar Kahan Tak Shab-e-Hijraan Kab Tak

Toott Kar Bikhro

Tanha Tumhari Shaamain Hon
Moonh Morh Le Duniya Tum Se
Udaas Tumhari Raatein Hon
Her Khushi Rooth Jaye Tum Se
Pukaar Lena Tum Mujhey
Ek Moqa Dena Tum Mujhey
Tumharey Zakhm Zakhm Badan Ko
Apney Khayal Ka Marham Doon Ga
Jaltey Hoye Daman Ko
Tammana'on Ka Sangam Doon Ga
Sambhaal Loon Ga Tumharey Toottey Dil Ko
Mein Thaam Loon Ga Her EK Pal Ko
Apney Seeney Se Laga Kar
Tumhari Kaamnaa'on Ko Dilaasa Doon Ga
Tumhari Bhaagnaa'on Ko Sahara Doon Ga
Ke Phir Kaheen
Tum Kabhi Toott Kar Bikhro
Bikhar Ke Sulgo
Tanha Na Tumhari Zaat Ho
Tumahrey Saath
Mein Bhi Toottoon
Toott Kar Bikhroon
Aur Bikhar Ke Sulgoon

[nicekhan_05]

Re: Ghaflat-e-Yaar Kahan Tak Shab-e-Hijraan Kab Tak

Mujh Se Khafa Ho Ke

Mujh Se Khafa Ho Ke Chup Chaap Sa Beth Jata Hai
Khud Bhi Jalta Hai Mujhey Bhi Saath Jalata Hai

Us Ko Manatey Hoye Mein Khud Hi Rooth Jayun To
Phir Merey Paas Aa Ke Raat Bhar Mujhey Manata Hai

Khud Hi Sawal Kar Ke Khud Hi Jawab Deta Hai
Phir Merey Seeney Se Lag Ke Khud Hi Gungunata Hai

Us Ek Pal Ke Sadqey Mein Meri To Her Khushi Qurbaan
Jab Wo Sher Kehtey Hoye Dheerey Se Muskurata Hai

Subh Ka Sitara Lagta hai Zindagi Se Piyara Lagta Hai
Meri Bahon Mein Aatey Hoye Jab Wo Bohut Sharmata Hai

Meri Yaad Ke Mausam Ko Palkon Pe Sajaye Rakhta Hai
Beetey Hoye Her Pal Ki Khabar Mil Kar Mujhey Batata Hai

Merey Bagher Kesey Guzri Us Ki Kal Ki Raat
Us Ki Aankh Ka Phela Kajal Saari Kahani Sunata Hai

Is Shehar Ke Sawan Mein Barish Ki Raat Jab Aati Hai
Be Ikhtiyaar Hi Ek Shakhs Yaad Bohut Aa Jata Hai

Mein Us Ke Naam Ki Nisbat Se Mooatbar Hun Apni Zaat Mein
Merey Kahayl Ka Her Ek Saaz Geet Usi Ke Gata Hai

[nicekhan_05]

Re: Ghaflat-e-Yaar Kahan Tak Shab-e-Hijraan Kab Tak

Tumhain Yaad Hai Na
Tumhain Yaad Hai Na
Humari Aakhri Mulaqaat Ki Raat
Aankhon Se Barasti Barsaat Ki Raat
Mein Ne Tum Se Kaha Tha
Juda Tum Se Ho Ke
Jee To Loon Ga Lekin
Gar Tumhari Ijazat Ho To
Tumhari Yadon Ka Sahara Chahye Mujh Ko
Tumhain Yaad Hai Na
Mein Ne Tum Se Kaha Tha
Ek Ye Hi Aasra Chahye Mujh Ko
Magar JanaN
Ye Kya Kiya Tum Ne
Apni Yadon Ko Cheen Liye Tum Ne
Mujh Se Merey Jeeney Ka
Aakhri Sahara Cheen Liya Tum Ne
Ab Kiya Karoon JanaN
Ke Ab Zinda Reh Nahee Sakta
Mazeed Dard Seh Nahee Sakta
Apney Bardaasht Ki Hadon Ko Choo Raha Hun Mein
Zindagi Se Ab Bicharh Raha Hun Mein
Apna Wadaa Poora Kar Raha Hun Mein
Tumhain Yaad Hai Na!
Wo Aakhri Mulaqat Ki Raat
Ye Hi Kaha Tha Mein Ne

[nicekhan_05]

Re: Ghaflat-e-Yaar Kahan Tak Shab-e-Hijraan Kab Tak

Wafa'oN Ki Talash MeiN

Wafa'oN Ki Talash MeiN
Sadaa'oN Ki Talash MeiN
Samandar Dekhay Dariya Dekhay
Jungle Dekhay Sehra Dekhay
NaheeN Koi Mil Saka
Jo Taskeen-e-Dil-o-JaaN Hota
Mehakta Hua ArmaaN Hota
Meri DhaRhkanoN Mein Woh Basta
Meray Jeenay Ka SaamaaN Hota
Meri Rooh Ka Woh Chain Hota
Meri Zindagi Ka UnwaaN Hota
Wafa'on Ki Talash MeiN
Zindagi Dar Ba Dar Bhatki
Sukoon Ke Ek EK Pal Ko Tarsa
Kabhi Door Khala'on MeiN Khoya
Kabhi Samandar Ki Gehraiyon MeiN Uljha
Aur Phir
Wafa'on Ki Talash MeiN
Bus Ek Samar Hi Haath Aya
Is Bhari Dunya MeiN
Wafa Ka Koi Wajood NaheeN
PaththroN Ke HaiN Jism Saaray
In MeiN Ehsaas Maujood NaheeN
Wafa Faqat Jis Ka Kaam Hai
MAUT Us Ka Naam Hai

[nicekhan_05]

Re: Ghaflat-e-Yaar Kahan Tak Shab-e-Hijraan Kab Tak

Ek Terey Jaaney Ke Baad

WeeraniyaaN muqaddar bani ek terey janey ke baad
MehroomiyaN muqaddar bani ek terey janey ke baad

Phaila hua ab to chaar soo andhera hai
TareekiyaN muqaddar bani ek terey janey ke baad

Beronaq meri tarah ghar ke dar-o-deewaar bhi hain
UdaasiyaN muqaddar bani ek terey janey ke baad

Dhaltey sooraj, taptey sehra aur khizan raseeda paton se
ShanasayaaN muqaddar bani ek terey janey ke baad

Hotey hain har taraf se ab ishaarey meri janib
RuswayaaN muqaddar bani ek terey janey ke baad

Dar khula rakhtey hain ke shayid too aye kabhi
Khush fehmiyaaN muqaddar bani ek terey janey ke baad

[Yaaram]

Re: Ghaflat-e-Yaar Kahan Tak Shab-e-Hijraan Kab Tak

wah Bohat KHooB umdah intekhab hay aap ke Nice Khan :) Bohat aala.......aainda bhi aate arhye aur share karte rahey :) shukrya

[aik_lerki]

Re: Ghaflat-e-Yaar Kahan Tak Shab-e-Hijraan Kab Tak

Bohat he zabardast
keep sharing

[nicekhan_05]

Re: Ghaflat-e-Yaar Kahan Tak Shab-e-Hijraan Kab Tak

Shukriya

[*Hala*]

Re: Ghaflat-e-Yaar Kahan Tak Shab-e-Hijraan Kab Tak

NICE SAHRING :rose

[Daood]

Re: Ghaflat-e-Yaar Kahan Tak Shab-e-Hijraan Kab Tak

Wah