Duniya - aik iqtibaas

[Masood]

DUNIYA


Yeh duniya bhi ajeeb hai. Sitamkaar, sitam'shuar, sitam'zareef, hanso to roti hai, roney per hansti hai. Ik turfa tamasha hai. Zindon ko charkey lagati hai. Marney walon key liye so so aansu bahati hai aur unkey ayoob-o-naqaais sifat-e-hasna mein badal deti hai. Un key marqad bnati hai aur irdgird sang-e-mar mar ki rangeen aur dil'aawez silein nasb karti hai - mehraab bnati hai, marqadon per phoolon ki chadar bichhati hai. Dastar'khawan bichha do to gidhon ki tarha lapakti hai - noch noch ker khati hai. Pet to bhar jata hai - ji nahin bharta. Koi ahl-e-sarwat ho to uski prastash karti hai. Uski qissah'khawani karti hai aur uski jahiyalat, ilmiyat mein badal deti hai. Ghar khali aur jaib-o-damaan tar tar dekhey to kinta hi shareef-ul-nafs aur qabil ho ussey ahmaq aur bewaqoof jaisey khitabaat sey nawazti hai. Yehi duniya hai jis mein ambiyaa aur aolyaa pedah huwey jinhon ney haqooq Allah aur haqooq-ul-Ebaad ka dars diya aur yehi duniya hai jis mein shaddad, nimrood aur faraoun ney janam liya. Saqrat ko zehar ka pyala kis ney peeney per majboor kiya aur Mansoor ko takhta-e-daar tak kis ney pohanchaya. Isi duniya ney. Jab is duniya ki is raah'ravi ka rona rotey hain to ham bhool jatey hain keh ham hi sey yeh duniya hai aur yeh duniya ham sey.......

Bazeecha-e-Itfaal hai duniya merey aagey
hota hai shab-o-roz tamasha merey aagey

[Z.]

Re: Duniya - aik iqtibaas

nice sharing :thmbup:

ye dunya hum sey hai aur hum is dunya sey

[aquari]

Re: Duniya - aik iqtibaas

ager yeh sub naa hota tu yeh duniya na hoti.......

[zmufti]

Re: Duniya - aik iqtibaas

buhat khoob
achcha intkhaab hai
aur shayad duniya inhiiN tazaadaat aur nasheb-o-faraz ki wajah se pur kashish hai
agar duniya ke tamaam insaanoN ko yaksaaN rahateN naseeb hotiiN to khushi aur gham meN tafreeq namumkin thee
umeed hasrat ya jadojehad ka bhee vajood na hota
kitni berang si duniya hoti
jazboN ke baghair