Ahadith - Ramadhan special

[.]

Re: Ahadith - Ramadhan special

حضرت معاویہؓ سے مروی ہے کہ نبیﷺ ایک دن اپنے اصحاب کے ایک حلقہ کے پاس پہنچے اور ان سے پوچھا۔ ’’آپ لوگ یہاں کیوں بیٹھے ہیں ؟‘‘ انہوں نے عرض کیا۔’’ہم اﷲ کو یاد کر رہے ہیں اور اس کی حمدو ثناء کر رہے ہیں۔ کیونکہ اُس نے ہمیں ہدایت سے نواز کر احسانِ عظیم فرمایا ہے۔‘‘ آپﷺ نے فرمایا:ابھی جبرئیلؑ میرے پاس آئے اور انہوں نے بتایا کہ اﷲ تعالیٰ فخر کے ساتھ فرشتوں سے تم لوگوں کا ذکر فرما رہا ہے۔ (صحیح مسلم)

[.]

Re: Ahadith - Ramadhan special

حضرت ابو الدرداءؓ سے روایت ہے کہ رسول اﷲﷺ نے فرمایا:کیا میں تم کو وہ عمل بتاؤں جو تمہارے سارے اعمال میں بہتر اور تمہارے مالک کی نگاہ میں دوسرے تمام اعمال سے زیادہ بلند کرنے والا ہے۔ یہ عمل راہِ خدا میں سونا چاندی خرچ کرنے اور جہاد سے بھی زیادہ افضل ہے۔صحابہؓ نے عرض کیا۔’’ یا رسول اﷲ ! ضرور بتائیے۔‘‘ آپﷺ نے فرمایا۔’’وہ اﷲ کا ذکر ہے۔‘‘ (مسند احمد،جامع ترمذی،سنن ابن ماجہ)

[.]

Re: Ahadith - Ramadhan special

حضرت عبداﷲ ابن عمرؓ سے روایت ہے کہ رسول اﷲﷺ نے فرمایا :اﷲ کے ذکر کے بغیر زیادہ کلام نہ کیا کرو کیونکہ اس سے دل میں سختی اور بے حسی پیدا ہوتی ہے۔ لوگوں میں وہ آدمی اﷲ سے زیادہ دور ہے جس کے دل میں سختی اور بے حسی ہو۔ (جامع ترمذی)

[.]

Re: Ahadith - Ramadhan special

حضرت سمرہ بن جندبؓ سے روایت ہے کہ رسول اﷲﷺ نے فرمایا : تمام کلموں میں افضل یہ چار کلمے ہیں :’’سُبْحَانَ اﷲِ‘‘ اور ’’اَلْحَمْدُﷲِ ‘‘ اور ’’لاَ اِلہ اِلَّا اﷲُ‘‘ اور ’’اَﷲُ اَکْبَرُ‘‘ (صحیح مسلم)

[.]

Re: Ahadith - Ramadhan special

حضرت ابو ہریرہؓ سے روایت ہے کہ رسول اﷲﷺ نے فرمایا:’’اس دنیا کی وہ تمام چیزیں جن پر سورج کی روشنی اور اس کی شعاعیں پڑتی ہیں ، ان سب چیزوں کے مقابلے میں مجھے یہ زیادہ محبوب ہے کہ میں ایک دفعہ ’’سُبْحَانَ اﷲِ وَالْحَمْدُﷲِ وَلَا اِلہ اِلَّا اﷲُ وَاﷲُ اَکْبَرُ‘‘ کہوں۔ (صحیح مسلم)

[.]

Re: Ahadith - Ramadhan special

حضرت جابرؓ سے روایت ہے کہ رسول اﷲﷺ نے فرمایا: سب سے افضل ذکر ’’لَا اِلہ اِلَّا اﷲُ‘‘ ہے۔ (جامع ترمذی، سنن ابن داؤد)

[.]

Re: Ahadith - Ramadhan special

حضرت ابو موسیٰ اشعریؓ سے روایت ہے کہ رسول اﷲﷺ نے مجھ سے ایک دن فرمایا:’’میں تمہیں وہ کلمہ بتاؤں جو جنت کے خزانوں میں سے ہے ؟ میں نے عرض کیا: ضرور بتائیں۔‘‘آپﷺ نے فرمایا:’’وہ ہے : لَا ھَوْلَ وَلَا قُوَّۃَ اِلَا بِاﷲ ( مسلم)

[.]

Re: Ahadith - Ramadhan special

حضرت بریدہؓ سے روایت ہے کہ رسول اﷲﷺ نے ایک آدمی کو اس طرح دُعا کرتے ہوئے سنا:’’اے اﷲ! میں اپنی حاجت تجھ سے مانگتا ہوں بوسیلہ اس کے کہ بس تو اﷲ ہے اور تیرے سوا کوئی مالک و معبود نہیں۔ ایک اور یکتا ہے۔ تو سب سے بے نیاز ہے اور سب تیرے محتاج ہیں۔ نہ کوئی تیری اولاد نہ تو کسی کی اولاد اور نہ تیرا کوئی ہمسر‘‘ رسول اﷲﷺ نے اس بندے کی یہ دُعا سُن کر فرمایا: اس بندے نے اﷲ سے اُس کے اِسم اعظم کے وسیلہ سے دعا کی ہے۔ جب اُس کے وسیلہ سے اُس سے مانگا جائے تو وہ دیتا ہے۔ اور جب اُس کے وسیلہ سے دعا کی جائے تو وہ قبول کرتا ہے۔ (جامع ترمذی، سنن ابی داؤد)

[.]

Re: Ahadith - Ramadhan special

حضرت اسماء بنت یزیدؓ سے روایت ہے کہ رسول اﷲﷺ نے ارشاد فرمایا:’’ اسم اﷲ الاعظم‘‘ ان دو آیتوں میں موجود ہے۔ ایک۔’’والٰھُکُمْ اِلٰہ واحِد لاَ اِلٰہَ الّا ھُوَالرَّحْمٰنُ الرّحِیْم‘‘ اور دوسری۔ ’’اٰل عمران کی ابتدائی آیت ’’الٓمّٓ اَﷲُ لَا اِلٰہَ اِلَّا ھُوَ الْحَیُّ الْقَیُّوْم‘‘۔ (جامع ترمذی، سنن ابو داؤد ابن ماجہ، سنن ابن ماجہ، سنن دارمی)

[.]

Re: Ahadith - Ramadhan special

حضرت ابو سعید خدریؓ سے روایت ہے کہ رسول اﷲﷺ نے فرمایا کہ اﷲ تبارک و تعالیٰ کا ارشاد ہے کہ جس شخص کو قرآن نے مشغول رکھا میرے ذکر سے اور مجھ سے سوال اور دعا کرنے سے تو میں اس کو اس سے افضل عطا کروں گا جو سائلوں اور دعا کرنے والوں کو عطا کرتا ہوں۔ دوسرے کلاموں کے مقابلہ میں اﷲ کے کلام کو ویسی ہی عظمت و فضیلت حاصل ہے جیسی اپنی مخلوق کے مقابلہ میں اﷲ تعالیٰ کو۔ (جامع ترمذی، سنن دارمی، شعب الایمان للبیہقی)

[.]

Re: Ahadith - Ramadhan special

حضرت عبیدہ ملیکیؓ سے روایت ہے کہ رسول اﷲﷺ نے فرمایا:’’اے قرآن والو! قرآن کو اپنا تکیہ اور سہارا نہ بنا لو بلکہ دن اور رات کے اوقات میں اس کی تلاوت کیا کرو جیسا کہ اس کا حق ہے۔ اس کو پھیلاؤ اور اس کو دلچسپی اور مزہ لے لے کر پڑھا کرو۔ اس میں تدبر کرو اور امید رکھو کہ تم اس سے فلاح پا جاؤ گے۔ اس کا عاجل معاوضہ لینے کی فکر نہ کرو۔ اﷲ تعالیٰ کی طرف سے اس کا عظیم ثواب اور معاوضہ ملنے والا ہے ‘‘۔ (شعب الایمان للبیہقی)

[.]

Re: Ahadith - Ramadhan special

حضرت عمر بن الخطابؓ سے روایت ہے کہ رسول اﷲﷺ نے ارشاد فرمایا:’’اﷲ تعالیٰ اس کتابِ پاک یعنی قرآن مجید کی وجہ سے بہت سوں کو اونچا کرے گا اور بہت سوں کو نیچے گرائے گا۔ (صحیح مسلم)

[.]

Re: Ahadith - Ramadhan special

حضرت عبداﷲ بن مسعودؓ سے روایت ہے کہ رسول اﷲﷺ نے ارشاد فرمایا:جس نے قرآن پاک کا ایک حرف پڑھا اس نے ایک نیکی کمالی اور یہ کہ ایک نیکی اﷲ تعالیٰ کے قانون کے مطابق دس نیکیوں کے برابر ہے۔میں یہ نہیں کہتا کہ ’’الٓم‘‘ ایک حرف ہے بلکہ الف ایک الگ حرف ہے ، لام ایک الگ حرف ہے اور میم ایک الگ حرف ہے۔ (ترمذی، سنن دارمی)

[.]

Re: Ahadith - Ramadhan special

حضرت عبداﷲ بن عمرؓ سے روایت ہے کہ رسول اﷲﷺ نے فرمایا:’’بنی آدم کے قلوب پر اسی طرح زنگ چڑھ جاتا ہے جس طرح پانی لگ جانے سے لوہے پر زنگ آ جاتا ہے۔ عرض کیا گیا کہ: ’’دلوں کے اس زنگ کے دور کرنے کا ذریعہ کیا ہے ؟‘‘ آپﷺ نے ارشاد فرمایا کہ ’’موت کو زیادہ یاد کرنا اور قرآن مجید کی تلاوت‘‘۔ (شعب الایمان للبیہقی)

[.]

Re: Ahadith - Ramadhan special

حضرت عبداﷲ ابن عباس اور حضرت انس بن مالکؓ سے روایت ہے کہ رسول اﷲﷺ نے ارشاد فرمایا:’’سورۃ ’’اذازلزلت‘‘ نصف قرآ ن کے برابر ہے اور ’’قل ھو اﷲ احد‘‘ تہائی قرآن کے برابر ہے اور ’’قل یٰٓا یھا الکٰفرون‘‘ چوتھائی قرآن کے برابر ہے۔ (جامع ترمذی)