Tweet
خورشید بکف کوئی کہاں ہے
سب اپنی ہی روشنی جاں ہے
میں بھی تو ادھر ہی جا رہا ہوں
مجھ کو بھی تلاش ِ رفتگاں ہے
پھر دیکھنا خواب عہد رفتہ
مل لو ابھی وقت مہرباں ہے
سودا بھی کرو تو کیا کہ دنیا
باہر سے سجی ہوئی دکاں ہے
شعلے کو خبر ہی کیا نمو میں
اپنے ہی وجود کا زیاں یے
ہرلحظہ بدل رہی ہے دنیا
ہر پل کوئی خواب رائیگاں ہے
لیتا ہی نہیں کہیں پڑاو
یادوں کا عجیب کارواں ہے
مانا کہ جدا نہیں ہیں ہم تم
پھر بھی کوئی فصل درمیاں ہے
اے ابر بہارِ نو برس بھی
پھر تازہ ہجوم ِ تشنگاں ہے
اے موج ِ فنا گزر بھی سر سے
ہونے کا مجھے بہت گماں ہے
:rose