Tweet
قدموں میں میرے جھکی ہوئی رات
تاروں کی طرح بچھی ہوئی رات
گرتی ہے بدن پہ قطرہ قطرہ
خوشبو سے کشید کی ہوئی رات
آنکھوں پہ ستارے چن رہی ہے
آنگن میں میرے کھلی ہوئی رات
ماتھے پہ نئی رفاقتوں کے
افشاں کی طرح چنی ہوئی رات
آہٹ پہ کسی کی کسمسائی
دلہن کی طرح سجی ہوئی رات
تاعمر نہ ٹوٹنے دے نشہ
ساقی سے میرے ملی ہوئی رات
چھوتی ہے ایک ایک تارا
آکاش پہ تیرتی ہوئی رات
حل ہونے لگی لہو میں میرے
سانسوں میں تیرے گھلی ہوئی رات
شبنم سے گلاب پوچھتے ہیں
اب تک تھی کہاں چھپی ہوئی رات
اک پل کو جھبک سکی نہ پلکیں
آنکھوں میں رہی رکی ہوئی رات
کیا چین کی نیند سورہی ہے
اک عمر سے جاگتی ہوئی رات
ہے چُور تھکن سے لیکن اب تک
شاداب ہے ٹوٹتی ہوئی رات
اک لمحہ سخن پہ ایسا آیا
چُپ ہوگئ بولتی ہوئی رات
پروین شاکر