Gar mujhey iska yaqeeN ho

[.]

Gar mujhey iska yaqeeN ho
mere humdum, mere dost
gar mujhey iska yaqeeN ho
ke tere dil ki thakan
teri ankhooN ki udasi, tere seeney ki jalan
meri diljooi, mere pyar se mit jaey gee
gar mera harf-e-tasalli
woh dava ho, jis se
ji uthayy phir se tera ujda hoa bay-noor diyar
teri paishanee se dhul jaiN yeh tazleel ka daagh
teri beemar javani ko shifa ho jaey
gar mujhey iska yaqeeN ho
mere humdum mere dost
rooz-o-shab, shaam-o-sehar
maiN tujhey bhelata rahoon
maiN tujhey geet sunata rahoon
halkey sheereen
absharoon ke, baharoon ke, chaman_zarooN ke geet
amad-e-subh ke, mehtaab ke, sayyarooN ke geet
tujh se maiN husn-o-mohabbat ki hikayaat kahooN
jaisey maghroor haseenaooN ke barfaab se jism
garm hathoon ki hararat se pighal jatey haiN
jaisey ik chehrey ke Thaihrey hoey manoos naqoosh
dekhtey dekhtey he badal jatey haiN
kis tarah aariz-e-mehboob ka shafaf baloor
yakbayak baada-e-ahmer se dekhak jata hai
kaisey gulcheen ke liye jhuktee hai Khud jhuktee hai shaaKh-e-gulaab
kis tarah raat ka aiwaan mehak jata hai
yoonhee gata rahoon, gata rahooN, tere Khatir
geet bunta rahooN, baiTha rahoo, tere Khatir
par mere geet tere dukh ka madava he nahi
naghma jarrah nahi, moonis-o-gum_Khuwar sahi
geet nashtar to nahi, marham-e-azar sahi
tere azar ka charaa nahi, nashtar ke siva
aur ye safaak maseeha
mere qabzey main he nahi
is jahaN ke kisi zee-rooh ke qabzey maiN nahi
haaN magar tere siva, tere siva, tere siva