masjood e malaa'ik tiree kis se laRaa'ee hai ?

[Ismail Ajaz]

ek kalaam aiHbaab e PeGham kee nazr baad az salaam pesh e Khimat hai

arz kiya hai

kyuN tuu ne DeRh eeNT kee masjid banaa'ee hai ?
masjood e malaa'ik tiree kis se laRaa'ee hai ?

amn o amaan dunyaa meN barbaad tuu nah kar
sajde keliye rab ne yeh dhartee bichhaa'ee hai

nasl o raNg zubaan tow haiN Husn zameeN ke
gulshan ke saare phooloN meN pinhaaN Khudaa'ee hai

mat bhool Khaleefah hai tuu Allah kee zameeN par
tere liye zahoor meN har cheez aa'ee hai

ay ummat e muslim tujhe aaKhir hai huwaa kyaa ?
nafrat hai darmiyaan meN ulfat paraa'ee hai

ulfat o aKhuwwat ke Alamdaar yeh bataa
kyuN dunyaa meN bad amnee o giryah duhaa'ee hai ?

baaqee rahaa naheeN kyuN aCar abb duaa'oN meN
teree fuGhaaN kee aasmaaN tak naarasaa'ee hai

be rahravee o shirk meN Doobaa huwaa hai tuu
maiHsoos tujh ko hotee naheeN abb buraa'ee hai

har aan aaKhirat se huwaa be Khabar hai kyuN
mann chaahee zindagee meN kahaaN paarsaa'ee hai

iKhlaaS laa tuu apnee jabeeN saa'ee meN "Khayaal"
tujh meN hai Khudsaree baRee tujh meN baRaa'ee hai

Ismail Ajaz Khayaal