Tweet
واسطہ حُسن سے یا شدتِ جذبات سے کیا
واسطہ حُسن سے یا شدتِ جذبات سے کیا
عشق کو تیرے قبیلے یا میری ذات سے کیا
میری مصروفیتیں اُس کو کہاں روک سکیں
وہ تو یاد آئے گا اُس کو میرے دن رات سے کیا
پیاس دیکھوں یا کروں فکر کہ گھر کچا ہے
سوچ میں ہوں کہ میرا رشتہ ہے برسات سے کیا؟
میں تو کہتا رہا مٹ جائےگا تُو بھی اک دن
میرے قاتل کو مگر میرے خیالات سے کیا
اک اثاثہ ہوا کرتے ہیں نقوشِ ماضی
تجھ کو لگتا نہیں بوسیدہ عمارات سے کیا
جس کو خدشہ ہو کہ مر جائیں گے بچے بھوکے
سوچئے! اُس کو کسی اور کے حالات سے کیا
آج اُسے فکر کہ کیا لوگ کہیں گے طاہر
کل جو کہتا تھا مجھے رسم و روایات سے کیا
